1456, 12 aout. — La Brosse-Cadier.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Comme Anthoine Griffon, forestier et garde des bois de nostre chastellenie et mandement de Cerviere en nostre conté de Fourez a ce esté desmis et privé de sondit office de forestier par les ballis et autres nos officiers de nostredit conté de Fourez a l'occasion de certains abuz et malefices par lui commis et perpétré en sondit office, et pour le bien et prouffit de nous, est besoing et necessaire de y comettre homme ydoene et souffisant a exercer ledit office, pour lesquelles causes, savoir faisons que, pour le bon rapport qui fait nous a esté de la personne de Loys Vachon, demeurant audit mandement de Cerviere, confians a plein de ses sens, loyaulté, preudomie, souffisance et bonne diligence, a icellui Loïs Vachon avons donné et octroïé, donnons et octroïons de grace especial par ces presentes l'office de forestier et garde de nos bois de la chatellenie et mandement de Cerviere, et en avons desmis et deschargé, demettons et deschargeons par ces presentes ledit Anthoine Griffon pour les causes dessusdictes, a icellui office de forestier avoir, tenir et excercer doresenavant par ledit Loïs Vachon aux gages, droiz, prouffiz et esmolumens acoustumés et audit office appartenans, tant comme il nous plaira. Si donnons en mandement par ces mesmes presentes a noz amez et feaulx gens de noz comptes, balli, maistre des eaus et forests, procureur et tresorier de nostredit conté de Fourez, et a chascun d'eulx, si comme a lui appartiendra, que, pris et receu dudit Loïs Vachon le serement acosutumé de faire en tel cas et caution pour ce bailler en nostre chambre des comptes, il le mettent et instituent, ou facent mettre et instituer en possession et saisine dudit office et d'icellui ensemble des gages, droiz, prouffiz et esmolumens dessusdiz, le facent, laissent et seuffrent joïr et user plainierment et paisiblement, sans lui faire mettre ou donner ne souffrir estre fait, mis ou donné aucun destorbier ou empeschement ou contraire, mais a lui obeir de tous es choses touchans et concernans ledit office, en ostant et deboutant ledit Anthoine Griffon et tout autre illicite detenteur non aïant nos lettres precedens ces presentes, esquelles en tesmoing de ce, avons fait mettre nostre seel. Donné a la Brosse Cadier lez Moulins, le XII jour d'aoust l'an de grace mil CCCC LVI.

Par monseigneur le duc.