1455, 18 décembre. — Moulins (Château).

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a noz amez et feaulx gens de noz comptes a Molins, savoir faisons que nous avons mis et par ces presentes mectons nostre bien amé Guillaume Henrricon, escuïer, archer du corps de monseigneur le roy, en respit et souffrance de nous fere les foy et hommaige qu'il nous est tenu de fere de certaine terre et chevanche qu'il a et luy appartient tant a cause de sa femme que par acquisicions par luy fetes en noz chastellenies d'Aynay et de Germigny, et generallement de tout ce qu'il tient et peut tenir en fief de nous en nostre païs et duchié de Bourbonnois et ressort d'icelluy, jusques a Pasques prouchaines venans. Si vous mandons que de noz presente grace, respit et souffrance vous fetes, laissez et souffrez ledit Guillaume Henricon joÿr et user plainement et paisiblement, sans durant ledit temps le molester ne empescher, ne souffrir estre molesté ne empesché en quelque maniere que ce soit, mais, lesdictes choses estoient pour ce prinses, saisies ou empeschees, les luy mectent ou facent mectre a plaine delivrance^a. Donné en nostre chastel de Molins, le XVIII^e jour de decembre, l'an de grace mil CCCC cinquante et cinq.

Par monseigneur le duc,