1455, 11 décembre. — Moulins (Château).

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a nos amez et feaulx les balli et president de Fourez, ou a leurs lieuxtenants, salut. Come Pierre Boyet, nostre prevost et greffier de Saint Bonnet et de Marols, pour aucun cas et crimes dont il est acousés, soit detenu et empeschés de sa personne, tellement qu'il ne puet vacquet a excercer lesdiz offices, pour quoy soit besoing adjoindre ou pourvoir de personne ydoene et souffisant, savoir vous faisons que nous, confians a plain des sens, loyaulté, prudence, souffisance et bonne diligence de Mathieu Besset, clerc, juré notaire de court de Fourez, a icellui, du consentement dudit Pierre Boyet, avons commis et ordonné, comettons et ordonnons par ces presentes coajotteur avec ledit Pierre Boyet a l'excercice desdiz offices de greffe dudit Saint Bonnet et de Marols, a iceulx offices avoir, tenir, gouverner et excercer en l'absence dudit Pierre Boyet a la moitié des droiz, gages, prouffiz et esmolumens acoustumés et qui y appartiennent, laquelle moitié volons que ledit Besset aie et percoive tant comme il nous plaira. Si vous mandons, et a chascun de vous, si comme a luy appartiendra, que, pris et receu dudit Mathieu Besset le serement acoustumé de faire en tel cas et caution souffisante, s'il y est, et vous, de nostre presente revussion et adjoutement audit office de greffier, faites, laissez et souffrez ledit Mathieu Besset joïr et user plainierment et paisiblement, et a lui obeir de tous et ainsi qu'il appartiendra touchant ledit office, car ainsi nous plaist estre fait. Donné en nostre chastel de Molins, le XI^e jour de decembre, l'an de grace mil CCCC cinquante et cinq.

Par monseigneur le duc.