1455, 25 novembre. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plein des sens, science, prudence, prudomie et bonne diligence et pour les louables et commandables vertus estans en la personne de nostre amé et feal chevalier, conseiller et chambellan, messire Arthaud de Saint Germain, seigneur de Montrond, a icellui avons donné et octroïé, donnons et octroïons de grace especial par ces presentes l'office de commissaire des dons et octrois qui nous serons doresenavant fait en nostre conté de Fourez, a present vaccant par le decés et trespassement de feu Guiot de Chastelneuf, escuïer, seigneur de Laignec, dernier detenteur et possesseur dudit office, pour icellui office de commissaire avoir, tenir et excercer doresenavant par ledit messire Arthaud de Saint Germain a telz gages que par nous lui seront doresenavant tauxés et ordonnés quant le cas y eschera, tant qu'il nous plaira. Si donnons en mandement par ces mesmes presentes a noz amé et feaulx gens de noz comptes que, prins et receu dudit Arthaud de Saint Germain le serement acousutmé de fayre en tel cas, il le mettent et instituent, ou facent mettre et instituer en possession et saisine dudit office de commissaire desdiz dons et octroiz qui nous serons faiz en nostredit conté de Fourez, et d'icelui office ensemble desdiz gaiges, droiz, prouffiz et esmolumens acousutmés et audit office appartenans, le facent, laissent et seuffrent joïr et user plainierment et paisiblement et a lui obeir et entendre de toutes choses audit office appartenans, en ostant et deboutant d'icellui office tout autre illicite detenteur non aïant sur ce nos lettres precedans en date ces presentes, ausquelles, en tesmoing de ce, et a plus grant fermeté, nous avons fait mettre et apposer nostre seel, sauf nostre droit et l'autruy. Donné en nostre ville de Molins, le XXV jour de novembre, l'an de grace mil CCCC LV.

Par monseigneur le duc.