1455, 11 novembre. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plein des sens, science, prudence, vaillance, prudomie et bonne diligence, et pour les louables et commandables vertus estans en la personne de nostre amé et feal conseiller et chambellan, messire Loïs Mareschal, chevalier, seigneur d'Appinac, a icellui avons donné et octroïé, donnons et octroïons de grace especial par ces presentes l'office de juge des ressors de Saint Bonnet et Maleval en nostre comté de Fourez, a present vaccant par le decés et trespassement de feu Guiot de Chastelneuf, quant vivoit seigneur de Laignec, dernier possesseur et détenteur d'icellui, pour icelui office avoir, tenir doresenavant par ledit messire Loïs Mareschal aux gaiges, droiz et prouffiz et esmolumens acoustumés et audit office appartenans, tant qu'il nous plaira. Si donnons en mandement par ces mesmes presentes a noz amez et feaulx gens de noz comptes, balli et president de Fourez, ou a leurs lieuxtenans, et a chascun d'eux, si comme a luy appartiendra, que, pris et receu dudit messire Loïs Mareschal le serement acosutumé de fayre en tel cas, il le mettent et instituent, ou facent mettre et instituer, en possession et saisine dudit office de juge des ressors de Saint Bonnet et Maleval en nostredit conté de Fourez, et d'icellui ensemble desdiz gages, droiz, prouffiz et esmolumens acosutumés et audit office appartenans, le facent, laissent et seuffrent joïr et user plainierment et paisiblement, et a lui obeir et entendre de toutes choses audit office appartenans, en ostant et deboutant d'icellui office tout autre illicite detenteur non aïant sur ce nos lettres precedans ces presentes par lesquelles nous mandons oultre a nostre amé et feal tresorier de Fourez qui a present est ou sera par le temps ad venir, et a nos prevost et receveur dudit Bonnet et Maleval ou a celui ou ceulx qui ont acoustumé de païer lesdiz gages, qu'il paient, ballient et delivrent des deniers de leur recepte audit messire Loïs Mareschal lesdiz gages deuz et acoustumés de paier pour raison dudit office de juge des ressors de Saint Bonnet et Maleval aux termes et en la maniere acoustumés, et par rapportant ces presentes ou vidimus d'icelles fait soubz seel autentique pour une fois tant seulement, et quittance sur ce souffisant dudit messire Loïs Mareschal, lesdiz gages ou ce que paié en aura esté sera aloué es comptes et rabattu de la recepte de nostredit tresorier de Fourez ou de noz prevosts et receveurs dudit Saint Bonnet et Maleval ou de cellui ou ceulx qui aura paié lesdiz gages par nos amez et feaulx gens de noz comptes, ausqueux nouz mandons que ainsi le facent sans aucun contredit ou dififculté, et nonobstant quelxconques ordonnances, mandemens ou deffences a ce contraires. En tesmoing de ce, et a plus grant fermeté, nous avons fait mettre et apposer a ces presentes nostre seel. Donné en nostre ville de Molins, le XI jour de novembre, l'an de grace mil IIII^c cinquante et cinq.

Par monseigneur le duc.