1455, 5 novembre. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plein des sens, loyaulté, vaillance, prudence et bonne diligence de nostre amé et feal archier de nostre corps Jehan Quoquet, auquel avons donné et octroïé, donnons et octroïons de grace especial par ces presentes l'office de cappitaine et chastellain de Saint Hayan en nostre comté de Fourez, a present vaccant pour ce que nostre amé et feal escuïer Jehan Boissonier, dit de Saint Polgue, a esté naguerez pouveu de l'office de cappitaine et chastellain de Saint Romain et Mont Steu, lequel par avant tenoit et possedoit ledit office de cappitaine et chastellain dudit Saint Hayan, pour icellui office de cappitaine et chastellain dudit Saint Hayan avoir, tenir et excercer doresenavant par ledit Jehan Quoquet aux gages, droiz, prouffiz et esmolumens acoustumés et audit office appartenans, tant qu'il nous plaira. Si donnons en mandement par ces mesmes presentes a nos amés et feaulx gens de nos comptes, balli et president de Fourez, et a tous noz autres justiciers et officiers, ou a leurs lieutenans, et a chascun d'eulx, si comme a lui appartiendra, que, pris et receu dudit Jehan Quoquet le serement acoustumé de faire en tel cas, il le mettent et instituent, ou facent mettre et instituer en possession et saisine dudit office ensemble des gages, droiz, prouffiz et esmolumens acoustumés et audit office appartenans, le facent, laissent et seuffrent joïr et user plainement et paisiblement, et a lui obeir et entendre de toutes choses audit office appartenans, sans lui faire mectre ou donner ores ne par le temps ad venir aucun destorbier ou empeschement au contraire, en ostant et deboutant d'icellui office tout autre illicite detenteur non aïant sur ce noz lettres precedans en date ces presentes, ausquelles, en tesmoing de ce, nous avons fait mettre et apposer nostre seel, sauf en autres choses nostre droit et l'autruy en toutes. Donné en nostre ville de Molins, le V^e jour de novembre, l'an de grace mil IIII^c LV.

Par monseigneur le duc.