1455, 2 octobre. — La Brosse-Cadier.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faysons que nous, confians a plein des sens, loyaulté, preudomie et bonne diligence estans en la personne de nostre tres chier et tres amé Pierre Gordin, notaire, garde de nos sceaux aux contraulx de nostre conté de Fourez, icellui avons retenu et ordonné, retenons et ordonnons par ces presentes lettres en nostre conseiller pour nous servir oudit esta et office, estre et assister en noz conseilz et besoignes, et joïr et user des prerogatives, preheminences et droiz, prouffis et emolumens qui appartiennent et telz que usent et joÿssent les aultres conseillers de nostre conseil, et, pour plus honestement soy entretenir en nostre service audit estat et office de conseiller, lui avons tauxé et ordonné, tauxons et ordonnons par ces presentes la somme de vint livres tournois, a icelle somme prendre et avoir par chascun en des deniers de noz finances par la main de nostre amé et feal tresorier de Fourez, Jehan Rabineau, aux termes et en la maniere que les aultres pencions de noz autres conseillers sont et ont acoustumé d'estre paiees. Si donnons en mandement par ces mesmes presentes a nostre amé et feal chancellier que, prins et receu dudit Pierre Gordin le serement acoustumé de faire en tel cas, il le appelle et covoque et face appeller et convoquer ausdiz conseilz et besoignes, et joïr et user des prerogatives et franchises dessusdictes, mandons oultre a nostredit tresorier de Fourez Jehan Rabineau qu'il paie, ballie et delivre chascun an doesenavant et des deniers de sa recepte audit Pierre Gordin ladicte somme de vint livres tournois de pencion aux termes et par la forme et maniere dessusdicte, et par rapportant ces presentes ou vidimus d'icelles fait soubz seel autentique pour la premiere foy seulement, et quittance sur ce souffisante dudit Pierre Gordin, tout ce que par lui aura esté a ceste cause par vous [payé^a] sera alloué en voz comptes, et rabatue de vostre recepte par nos amez et feaulx [gens] de noz comptes, auxquelz nous mandons que ainsi le facent sans aucun contredit ou difficulté, nonobstant quelzconques ordonnances, mandemens ou deffences a ce contraires. En tesmoing de ce, nous avons fait mettre nostre seel a ces presentes. Donné a la Brosse Cadier ez Molins, le second jour d'octobre, l'an de grace mil CCCC et cinq.

Par monseigneur le duc.