1455, 30 septembre. — La Brosse-Cadier.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plain des sens, loyaulté, prudence, prudomie et bonne dilligence et pour le bon rapport et tesmongnaige qui fait nous a esté de la personne de nostre bien amé Pierre Guiot, prevost de Saint Victour, nous, a icellui avons donné et octroïé, donnons et octroïons de grace especial par ces presentes les offices de prevost et greffiez de la Foullouse et garde de noz bois, estangs en noz mandemens de la Foullouse, de la Tour en Jarez, Saint Hayan et Saint Victour, avecques les bois du Teil, a present vaccans par la pure et simple resignacion aujourd'uy faicte en noz mains par Guillaume Bonnet, de Saint Rambert, dernier detenteur et possesseur d'iceulx offices, et lequel nous en avons deschargé et deschargeons par ces presentes lettres de son voloir et consentement et a sa priere et requeste, pour iceulx offices avoir, tenir et excercer doresenavant par ledit Pierre Guïot, aux gages, droiz, proufiz et esmolumens acoustumés et audiz offices appartenans, avecques l'office de prevost de Saint Victour qu'il tenoit par avant, tant qu'il nous plaira. Si donnons en mandement par ces mesmes presentes a noz amez et feaulx gens de noz comptes, bailli et president de Fourez, ou a leurs lieutenans, et a chascun d'eulx, si comme a lui appartiendra, que, pris et receu dudit Pierre Guïot le serement acoustumé de fere en tel cas et caucion suffisante pour ce ballié en nostre chambre des comptes, il le mettent et instituent, ou facent mettre et instituer en possession et saisine desdiz offices et d'iceulx offices ensemble desdiz gages, droiz, prouffiz et esmolumens acoustumez le facent, laissent et seuffrent joïr et user plainement et paisiblement, sanz lui fayre mettre ou donner, ne souffrir estre fait, mis ou donné aucun destorbier ou empeschement au contraire, oste et deboute d'iceulx offices tous autres detenteurs non aïans sur ce noz lettres precedens en date ces presentes par lesquelles nous mandons oultre a noz amez et feaulx gens de noz comptes que il allouent es comptes et rabatent de la recepte dudit Pierre Guïot la somme des gages deuz et acoustumés d'estre paiés a cause et pour raison desdiz offices doresenavant, chascun an, aux termes et en la maniere acoustumez, par rapportant ces presentes ou vidimus d'icelles fait soubz seel autentique pour une foiz tant seulement, sanz y fayre reffuz ou difficulté, nonobstant quelxconques ordonnances, mandemens ou difficultés a ce contraires. En tesmoign de ce, et a plus grant fermeté, nous avons fait mettre et apposer a ces presentes nostre seel, sauf nostre droit et l'autruy en tout. Donné a la Brosse lez Molins, le dernier jour de septembre, l'an mil IIII^C LV.

Par monseigneur le duc.