1455, 29 septembre. — La Brosse-Cadier.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plein des sens, loyaulté, prudommie et bonne diligence, et pour le bon rapport et tesmoniage que fait nous a esté de Anthoine de Noaillat, perochien de Saint Priet la Vetre, a icellui avons donné et octroïé, donnons et octroyons de grace especial par ces presentes l'office de sergent general de nostre conté de Fourez et ses ressorts, ou nombre des sergents ordinaires de nostre chatellenie de Cerviere, vaccant a present par le decés et trespassement de feu Bonnet de Guirande, dernier detenteur dudit office, pour icellui office de sergent general en nostredit conté de Fourez, avoir, tenir et excercer par ledit Anthoine de Noaillat aux gaiges drois, prouffiz et emolumens acoustumés et audit office apapartenans, tant qu'il nous plaira. Si donnons en mandement par ces mesmes presentes a nos amez et feaulx gens de noz comptes, ballif et president de Fourez, ou a leurs lieutenens, et a chascun d'eulx, si comme a luy appartiendra, que, prins et receu dudit Anthoine de Noaillat le serement acousutmé de faire en tel cas et caution sur ce suffisant pour ce ballié en nostre chambre des comptes, il le mettent et instituent, ou facent mettre et instituer en possession et saisine dudit office s'il est a ce souffisant et ydoene, et d'icelluy office ensemble desdiz drois, gages, prouffiz et esmolumens acoustumés, le facent, laissent et seuffrent joïr et user plainement et paisiblement sans lui faire mectre ou donner, ne souffrir estre fait, mis ou donné aucun destorbiers ou empeschement de contraire, en ostant et deboutant d'icellui office tout autre illicite detenteur non ayant nos lettres en date precedans ces presentes, esquelles, en tesmoing de ce, et a plus grant fermeté, nous avons fait mettre a ces presentes^a nostre seel, sauf en aultres chouses nostre droit et l'autruy en toutes. Donné a la Brosse Cadier les Moulins, le penultieme jour de septembre, l'an de grace mil CCCC cinquante et cinq.

Par monseigneur le duc.