1455, 10 septembre. — La Brosse-Cadier.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que, pour le bon rapport qui fait nous a esté de la personne de nostre amé et feal escuier Robert Guitois, confians a plein de ses sens, loyaulté^a, industrie, vaillance, souffisance et bonne diligence, a icelui Robert Guitois avons donné et octroïé, donnons et octroïons de grace especial par ces presentes l'office de cappitaine et chastellain de nostre ville de Sury le Comtal en nostre conté de Fourez, vacquant a present par la mort de Jehan Guitois, pere dudit Robert Guitois, derrenier detenteur d'icelui, a icellui office avoir, tenir et excercer aux gaiges, droiz, prouffiz, honneurs et esmolumens acoustumez et audit office appartenans, tant qu'il nous plaira. Si donnons en mandement par ces mesmes presentes a nostre balli de nostre conté de Fourez, ou a son lieutenant, que, prins et receu^b dudit Robert Guitois le serment acoustumé de faire en tel cas, il le mette et institue, ou face mettre et instituer, en possession et saisine dudit office, et d'icellui ensemble des gaiges, droiz, prouffiz, honneurs et esmolumens dessusdiz le face, laisse et seuffre joïr et user pleinement et paisiblement, et a lui obeir de toutes les choses touchans et concernans ledit office de cappitaine et chastellain de nostredit ville de Sury le Comtal, car ainsi nous plaist il estre fait. En tesmoing de ce, nous avons fait mettre nostre seel a ces presentes. Donné a la Brosse les Molins, le X^e jour de septembre, l'an de grace mil CCCC LV.

Par monseigneur le duc.