1455, 8 aout. — Chevagnes.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plein des sens, science, prudence, vaillance, loyaulté, preudomie et bonne diligence, et pour les louables et commandables vertus estans en la personne de nostre amé et feal escuyer Guiot de Chastelneuf, segneur de Leygnec, a icelluy avons donné et octroyé, donnons et octroyons de grace especial par ces presentes, l'office de cappitayne et chastellain de Saint Bonnet le Chastel et Maroux, en nostre conté de Fourez, a present vacant par le decés et trespassement de feu messsire Amé Vert, derrenier detenteur et possesseur dudit office, pour iceluy office avoir, tenir et excercer par ledit Guiot de Chastelneuf, segneur de Leygnec, aux gaiges, drois, prouffiz et esmolumens acoustumés et audit office appartenans, tant qu'il nous playra. Si donnons en mandement par ces mesmes presentes a nos amés et feaulx chanceiller et gens de nos comptes, et a chascun d'eulx, si comme a luy appartiendra, que, prins et receu dudit Guiot de Chastelneuf le serement acoustumés de fere en tel cas, il le mettent et instituent, ou facent mettre et instituer, en possession et saysine dudit office de cappitayne et chastellain de Saint Bonnet le Chastel et Maroux, et d'icelluy office ensemble des droiz, prouffiz, prerrogatives, preheminences et emolumens acoustumés et audit office appartenans, le facent, laissent et seuffrent jouyr et user playnement et paysiblement, et a luy obeir et entendre de toutes chouses audit office de cappitayne et chastellain de Saint Bonnet le Chastel et Maroux appartenans, en ostant et deboutant d'iceluy office tout autre illicite detenteur non aïant sur ce noz lettres precedens en date ces presentes, par lesquelles nous mandons oultre a nostre receveur ou prevost dudit Saint Bonnet le Chastel et Maroux qui a present est ou sera pour le temps ad venir, qu'il paye, ballie et delivre des deniers de sa recepte audit Guiot de Chastelneuf lesdiz gages aux termes et en la maniere acoustumés, et par rapportant ces presentes ou vidimus d'icelles fait soubz seel autentique pour une foy tant seulement, et quittance sur ce souffisant dudit Guiot de Chastelneuf, lesdiz gaiges ou ce que paié en aura esté sera aloué es comptes et rabatu de la recepte de nostredit receveur ou prevost de Saint Bonnet le Chastel et Maroux par noz amez et feaulx gens de nos comptes, auquel nous mandons que ainssy le facent sans aucun contredit ou difficulté, nonobstant quelconques ordonnances, mandemens ou deffences contrayres. En tesmoing de ce, et a plus grant fermeté, nous avons fait mettre et appousez a ces presentes nostre seel. Donné a Cheveygne le VIII^e jour d'aoust l'an de grace mil CCCC L V.

Par monseigneur le duc.