1455, 5 juillet. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres veront, salut. Savoir faisons que nous, confians a plain des sens, loyaulté, science, prudence, prudomie et bonne diligence et pour le bon rapport et tesmognaige qui nous a esté fait de la personne de nostre bien amé Jehan Symonin, fils de nostre amé et feal Jehan Symonin, praticien en nostre court de Fourez en nostre ville de Montbrison, a icellui avons donné et octroïé, donnons et octroïons de grace especial par ces presentes un des offices de greffe de nostre court de Fourez, pour icellui office avoir, tenir et excercer par ledit Jehan Symonin aux gages, drois, prouffiz, prerogatives et esmolumens acoustumés et audit office appartenans, tant qu'il nous plaira. Si donnons en mandement par ces presentes a nostre amé et feal president de Fourez et a son lieutenant, que, pris et receu dudit Jehan Symonin le serement acoustumé de fayre en tel cas, il le mette et institue, ou face mettre et instituer, en possession et saisine dudit office de greffier, et d'icellui ensemble desdiz droiz, gages, prouffiz, prerogatives et esmolumens, le face, laisse et seuffre joïr et user pleinement et paisiblement si il est a ce ydoene et souffisant, sans lui faire mettre ou donner aucun destorbier ou empeschement ou contraire. En tesmoing de ce, et a plus grant fermeté, nous avons fait mettre et apposer a ces presentes nostre seel. Donné en nostre ville de Molins, le XXV jour de juign, l'an de grace mil CCCC cinquante et cinq.

Par monseigneur le duc, a la relacion du conseil.