1455, 29 avril. — Moulins (Château).

Charles, duc de Bourbonnois et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que pour la bonne rellacion qui faite nous a esté de la personne de Jehan Garreau, nous, confians a plain de ses sens, loyaulté, preudommie, souffisance et bonne diligence, icelluy avons commis et ordonné, et par ces presentes commetons et ordonnons a excercer l'office de sergent general en nostre païs et duchié de Bourbonnois et ressort d'icelluy pour et au lieu de Jehan Mitinier, le quel on dit estre devenu malade de maladie de lespre, pour icelluy office avoir, tenir, gouverner et excercer par ledit Jehan Garreau aux gaiges, drois, prouffiz et emolumens acoustumez et oudit office appartenans, tant comme il nous plaira. Si donnons en mandement par ces mesmes presentes a nostre mareschal et seneschal de Bourbonnois, ou a son lieutenant, que, s'il luy appert de ladicte maladie, il recoive dudit Jehan Garreau le serement acoustumé de faire en tel cas, et aussi, prise caucion souffisante par les gens de noz comptes a Molins, il le mecte et institue ou face mectre et instituer en possession et saisine dudit office si a ce est ydoene et souffisant, et d'icelluy et des gaiges, droiz, prouffiz et emolumens dessusdiz et le face, laisse et seuffre joïr et user plainement et paisiblement, et a luy obeir de tous et en toutes choses touchans ledit office, en ostant et dechargant ledit Jehan Mitinier ou cas dessusdit et tout autre indeu detenteur dudit office non aïent nos lettres precedens en date ces presentes, lequel nous en ostons et deboutons par ces presentes, esquelles, en tesmoing de ce, avons fait mectre nostre seel. Donné en nostre chastel de Molins, le penultieme jour d'avril, l'an de grace mil CCCC cinquante et cinq.

Par monseigneur le duc,