1455 (n. st.), 18 janvier. — Moulins (Château).

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Comme pieça feu Olivier Loche en son vivant eust abenevise de noz officiers de nostre chambre des comptes de nostre conté de Fourez une place et cours d'eaue assise sur la riviere de Loire au port de Roenne, pour illec faire construire et ediffier ung molin, lequel abenevisement lui fut fait par nosdiz officiers aux coustumes et usaiges observés aux autres abenevisemens faiz par nosdiz officiers en nostredit conté, et ordonné que ledit Olivier paieroit les investisons^a, recognoissances et autres droiz et devoirs a nous appartenans es mains de nostre prevost de Roenne, et depuis ledit Olivier a basti, construit et ediffié ledit molin et a compaigné pour une moitié audit molin Jehan et André Peletiers, freres, habitans de nostre mandement de Perreux, pour cause de laquelle associacion et acompaignement nostre prevost de Roenne a demandé ausdiz freres les vetisons^b, recognoissances et autres droiz et devoirs a nous appartenans pour la cause dessusdicte, lesquels freres, afin d'empescher le paiement d'iceulx, ont denoncé a noz officiers de Perreux que ledit molin estoit assis dedans les fins et limites de nostredit mandement de Perreux, et que pour ceste cause n'estoient tenus paier aucunes vetisons, recognoissances ne autres droiz a nosdiz officiers de Roenne, avis que s'aucunes investisons, recognoissances ou deuvoirs en estoient deuz, ce seroient a noz officiers de Perreux, lesquelx, pour ceste cause, se sont opposé, par le moïen de laquelle opposition ont esté pieça meuz grandes altercacions et debatz entre noz officiers de nostre baronie de Roennois et de notredit mandement de Perreux, pour ce que lesdiz officiers dudit Perreux disoient ledit molin et ses appartenances estre de nostredit mandement de Perreux et dedans les fins et limitez de nostre baronie de Beaujeu, et de par nosdits officiers de Roennois a esté dit au contraire ains que ledit molin et ses appartenances, ensemble tout le cours de l'eau de ladicte riviere, ainsi qu'elle se comporte en long de nostredicte baronie de Roennois, est dedans les fins et limites de nostredicte barronie, et, de present, pour ce que ledit Olivier est alé de vie a trespassement sans hoirs, les creanciers dudit deffunct ont fait exposer en vente ledit molin et ses appartenances, pour telle part et porcion que y avoit ledit feu Olivier, pour en avoir paiement des sommes a eulx deues, par le moën desquelles constions, differens et debatz se pourront mouvoir grant procés entre tout noz dessusdiz officiers, qui nous seroient et pourroient estre domaigeables et de de grans fraiz, missions et despens, savoir faisons que, voulant obvier a telz pocés, missions et despens, par la deliberacion de nostre grant conseil, avons ordonné et ordonnons par ces presentes que ledit molin avecques ses appartenances sera et demorera, est et demore a nous et de nostre lige de nostredicte baronie de Roennois tant en domaine, lige, justice et jurisdicion que autrement, soubz le ressort de nostre bailli de Fourez, et avons voulu et voulons que lesdictes crieez qui seroient faites pour la vendicion dudit molin soient faictes par nosdiz officiers de Roenne au lieu de Roenne, sans ce que nosdits officiers de nostredit mandement de Perreux et baronie de Beaujeu y puissent aucune chose requerir ne demander orez ne pour le temps a venir. Si donnons en mandement par ces mesmes presentes a noz baillis et juges de Fourez et de Beaujeulois, chastellains de Roenois et de Perreux, et a tous noz justiciers, ou a leurs lieuxtenans, et a chascun d'eulx, si comme a lui appartiendra, que nostre presente ordonnance facent garder et observer de point en point selon sa forme et teneur, en faisant joïr et user nosdiz officiers de Roenne de la justice dudit molin et ses appartenances tout ainsi et par la maniere que dessus est declairé, sans leur faire mectre ne donner, ne souffrir estre fait, mis ou donné, aucun destorbier ou empeschement au contraire. En tesmoing de ce, nous avons fait mectre nostre seel a ces presentes. Donné en nostre chastel de Molins, le XVIII^e jour de janvier, l'an de grace mil CCCC cinquante et quatre.

Par monseigneur le duc, vous present,