1454, 22 octobre. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a nos amez et feaulx les gens de noz comtes de Molins, salut.

Savoir faisons que aujourd huy notre amé et feal escuïer Jehan de la Porte nous a faiz les foy et hommaige qu'il nous estoit tenu de faire de tout ce qu'il tient et peut tenir en fief de nous en notredit païz et duché de Bourbonnois et ressort d'icellui, et nous a juré et promis de tenir et acomplir toutes les choses contenues es chapitres de fidelité vielz et nouveaux, ausquelz foy et hommaige nous ledit Jehan de la Porte avons receu sauf nostre droit et l'autruy.

Si vous mandons que ledit Jehan de la Porte a cause desdits foy et hommaige non faiz, vous ne molestez, ne empeschiez, ne souffrez estre molesté ne empeschié en quelque maniere que ce soit, maiz si aucune choses du sien estoit pour ce saisie ou empeschee les lui metez ou faicte mettre ces lettres vehuent a plaine delivrance pourveu qu'il baillera sa nommee et denombrement desdites choses en la chambre de nosdits comptes dedans quarante jours prochains venans.

Donné en nostre chastel de Molins le XXII^e jour d'octobre l'an de grace mil CCCC cinquante et quatre.