1454, 30 septembre. — Moulins (Château).

Charles, duc de Bourbonnois et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France, a nos amez et feaulx conseillers les gens de noz comptes, salut. Savoir vous faisons que Jehan Sirot, nostre tresorier general, a paié, baillé, et delivré des deniers de sa recepte, par nostre commandement et ordonnance, a maistre Geoffroy le Queu, chanoine de l'eglise monseigneur saint Julien du Mans et procureur souffisament fondé par lettres de procuracion des doïen et chapitre de ladicte eglise, la somme de soixante livres quinze solz tournois, c'est assavoir LVII l. t. a eulx deubz par chascun an au terme de Toussains, pour raison de certaines messes et services fondez en ladicte eglise du Mans par feu nostre tres redoubté seigneur et ayeul, le duc Loys que Dieu pardoint, comme plus a plain apert par les lettres de nostredit ayeul, et aussi par noz lettres de certaine transaction et acors nagaires faiz entre nous d'une part et lesdiz doyen et chappitre du Mans ou leur procureur d'autre, le XXVII^e jour de juillet, l'an mil CCCC cinquante et trois, et ce pour le terme de Toussains prochain venant, et LXXV s. t. pour la valeur de cinq florins d'or ayans cours en ce royaulme, que ledit nostre ayeul duc Loys envoïoit chascun an pour offrir en icelle eglise a l'autiet dudit monseigneur saint Julian du Mans, dont lesdictes lettres font mencion, et tant bien que lesdiz LVII l. t. deussent avoir esté paiees par nostre receveur de Beauvoisis comme apert par lesdictes lettres, toutesfois pour eschever la despense qu'en ce eussent peu faire lesdiz doïen et chapitre devers icelui receveur, nous avons voulu quelles leur aient esté paiees par nostredit tresorier general pour ceste fois seulement, dont par ce moïen nostredit receveur de Beauvoisis pourra faire sur nous en ses comptes aucune despense. Si voulons et vous mandons que allouez es comptes et rabatez de la recepte de nostredit tresorier general ladicte somme de LX l. XV s. t., sans aucun contredit ou difficulté, en rapportant ces presentes et quittance sur ce souffisant, ensamble la dessusdicte procuracion, car ainsi nous plaist il estre fait. Donné en nostre chastel de Moulins, le derrenier jour de septembre, l'an de grace mil CCCC cinquante quatre.

Par monseigneur le duc,