1454, 2 mai. — Montluçon.

Charles, duc de Bourbonnoys et d'Auvergne, conte de Clermont et de Fourez, seigneur de Beaujeu et de Chastel Chinon, per et chambrier de France, a tous ceulx qui ces presentes lettres verront, salut. Savoyr faisons que nous, confians et a plein informez des cens, prudence, loyaulté, vaillance, prudomie, experience et bonne diligence de nostre amé et feal escuïer Pierre de Brusac, cappiteinne et chastellain de Saint Morice, en nostre pais de Rouvennois^a, a icelluy Pierre de Brusac avons donné et octroyé, donnons et octroyons de grace especial par ces presentes, l'office de gouverneur et chastellain de nostre pais de Rouvennoys, a present vaccant pour ce que naguere avons pourvu nostre amé et feal escuyer Jehan de Lavieu, seigneur d'Escolay, de l'office de cappitaine et chastellain de Neronde en nostre conté de Fourez, lequel, par avant, tenoit lesdiz offices de gouverneur et chastellain de Rouvenoiz, pour icelluy office de gouverneur et chastellain de Rouvenoiz avoir, tenir et excercer par ledit Brusac avec et ensemble lesdiz offices de cappiteinne et chastellain de Saint Morice, aux gages, drois, honneur, prouffiz, prerogatives, et emolumens accoustumez et audit office appartenans, tant qu'il nous playra. Si donnons en mandement par ces mesmes presentes a nos amez et feaulx ballif et president de Fourez, et autres noz officiers, ou a leurs lieuxtenans, et a chascun d'eux, comme a luy appartiendra, que, prins et receu dudit Brusac le serment accoustumez de faire en tel cas, ils le mettent et instituent, ou facent mettre et instituer en possession et saysine desdiz offices de gouverneur et chastellain de Rouvennoy et desdiz droiz, gaiges, prerogatives et emolumens dessusdiz, ensemble desdiz offices de cappiteinne et chastellain de Saint Morice, le facent, laissent et seuffrent jouyr et user paisiblement, sans luy faire ou souffrir estre fait aucuns empeschemens au contraires, en oustant et deboutant desdits offices tout autre illicite detempteur d'iceulx non ayant nos lettres en date precedens ces presentes, esquelles, en tesmoing de ce, et en plus grant fermeté, nous avons fait mettre nostre seel. Donné en nostre ville de Montluçon le II^e jour de may, l'an de grace mil CCCC LIIII.

Par monseigneur le duc.