1454 (n. st.), 14 avril. — Montluçon.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chambrier de France, a tous ceulx qui ces presentes lettres verront, salut. Savoir faisons que nous, confians a plein des sens, loyaulté et bonne diligence de nostre bien amé Guillaume Pilocherie le Jeune, et pour le bon rapport et tesmoignage qui fait nous a esté de sa personne, a icelluy avons donné et octroïé, donnons et octroyons de grace especial par ces presentes, l'office de vendeur des bois des forestz estans et assises en nostre chastellenie de Saint Just en nostre conté de Fourez, vaccant a present par la pure et simple resignacion aujourd'uy faite en noz mains par Guillaume Pilocherie, pere dudit Guillaume dessus nommé, derrenier detenteur dudit office, pour icelluy office de vendeur des bois de nosdits forestz de Saint-Just avoir, tenir et excercer par ledit Guillaume Pilocherie jeune aux gaiges, drois, prouffiz, prerogatives, franchises et esmolumens acoustumés et audit office appartenans, tant comme il nous plaira. Si donnons en mandement par ces presentes a noz amez et feaulx gens de noz comptes, balli et president de Fourez, ou a leurs lieuxtenans, et a chascun d'eux, comme a lui appartiendra, que, pris et receu dudit Guillaume Pilocherie le Jeune le serement acoustumé de fayre en tel cas et caution souffisante, ils le mettent et institutent, ou face mettre et instituer en possession et saisine dudit office de vendeur de bois de noz forests et ensemble les gages, droiz, prouffiz et esmolumens dessusdiz, le facent, laissent et seuffrent joÿr et user plainement et paisiblement, sans luy faire mettre ou donner, ne souffrir estre fait, mis ou donné aucun empeschement au contraire, en oustant et deboutant dudit office tout autre illicite detenteur d'icelluy non ayant nos lettres en date precedens ces presentes, et mandons oultre a nos gens de nosdiz comptes que par nostre receveur de Saint Just ou autre que lesdiz gaiges a acoustumés de paier, ils les facent paier, ballier et delivrer audit Guillaume Pilocherie le Jeune a cause desdiz offices, et iceulx allouent es comptes et rabatent de la recepte de nostre receveur de Saint Just ou autre que lesdiz gaiges a cause dudit office aura paier, par rapportant ces presentes ou vidimus d'icelles fait soubz seel autentique par la premiere fois seulement, et quittance sur ce souffisante dudit Guillaume Pilocherie, sans y fayre reffus ou difficulté, car ainsi le volons et nous plait estre fait, nonobstant quelxconques ordonnances, mandemens et deffences a ce contraires. En tesmoing de ce, et a plus grant fermeté, nous avons fait mettre a ces presentes nostre seel. Donné en nostre ville de Montluçon, le XIV^e jour d'avril, l'an mil IIII^c LIII avant pasques.

Par monseigneur le duc.