1454 (n. st.), 14 mars. — Montluçon.

Charles, ducs de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que pour la bonne relacion et tesmoignage qui fait nous a esté de la personne de Pierre Gueyton, a icellui avons donné et octroïé, donnons et octroïons de grace especial par ces presentes, l'office de sergent general de nostre conté de Fourez, a present vaccant par le decés et trespacement de feu Mathieu Buyon, dernier detenteur et possesseur dudit office, pour icellui office de sergent general avoir, tenir et excercer par ledit Pierre Gueyton aux gages, droiz, prouffiz et esmolumens acoustumés et audit office appartenans, tant comme il nous playra. Si donnons en mandement par ces mesmes presentes a noz amez et feaulx gens de noz comptes, bailli de Fourez, ou a son lieutenant, et a chascun d'eux, si comme a lui appartiendra, que, prins et receu dudit Pierre Gueyton le serement acoustumé de fayre en tel cas et caucion souffisante, il le mectent et instituent, ou facent mectre et instituer en possession et saisine dudit office de sergent general de Fourez, si a ce il est ydoenez et souffisant, et d'icellui office ensemble lesdiz gages, droiz, prouffiz et esmolumens acoustumés, le facent, laissent et seuffrent joïr et user plainement et paisiblement, sanz lui fayre mettre ou donner, ne souffrir estre donné aucun destorbier ou empeschement au contraire, en ostant et deboutant dudit office tout autre illicite detenteur d'icellui non ayant nos lettres precedens en dates ces presentes, esquelles, en tesmoign de ce et a plus grant fermeté, nous avons fait mettre nostre seel. Donné en nostre ville de Montluçon, le XIIII^e jour de mars, l'an de grace mil CCCC LIII.

Par monseigneur le duc.