1453, 11 décembre. — Montluçon (Château).

Charles, duc de Bourbonnois et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France, a noz amez et feaulx les gens de noz comptes a Moulins, salut et dilection. Savoir vous faisons que Jehan Sirot, nostre tresorier general, a paié et baillé des deniers de sa recepte, par nostre commandement et ordonnance, a maistres Pierre Cotet et Geffroy le Queu, chanoines de l'esglise du Mans, procureurs souffisamment fondez par lettres de procuracion des doyen et chappitre de ladicte eglise du Mans, la somme de soixante livres quinze solz tournois, c'est assavoir LVII l. pour les arrerages de LVII l. t. de rente que iceulx doyen et chappitre ont droit de prendre chascun an au terme de Toussains sur la prevosté et terre de nostre conté de Beauvoisis, donnees et assignees a ladicte eglise en l'onneur et reverence de monseigneur saint Julien par feu nostre tres redoubtés seigneur ayeul le duc Loys, pour sa devocion et pour une messe perpetuelle que lesdiz doyen et chappitre sont tenuz de dire et celebrer chascun jour en ladicte esglise, et ce pour le terme de Toussains dernier passé, et LXXV s. t. pour la valeur de cinq florins d'or ayans cours en ce royaulme, et que ledit nostre ayeul duc Loys envoyoit chascun an pour offrir en icelle esglise a l'aultier dudit monseigneur saint Julien du Mans, et combien que lesdiz LVII l. t. deussent avoir esté paiées par nostre receveur dudit conté de Beauvoisis, toutesvoyes pour eschever la despense qu'en ce eusseut peu fere lesdiz doyen et chappitre devers icellui receveur, nous avons voulu qu'elles leurs ayent ainsi esté paiees par nostredit tresorier general, dont par et moyen nostredit receveur de Beauvoisis n'en pourra fere sur nous, ne en ses comptes, aucune despense. Si voulons et vous mandons que ladit somme de LX l. XV s. t. allouez es comptes et rabatés de la recepte de nostredit tresorier general, sans aucun contredit ou difficulté, en rapportant ces presentes avec quittance desdiz maistres Pierre Cotet et Geffroy Queu, et aussi leurdicte procuracion a ce pertinent tant seulement, car ainsi nous plaist il estre fait. Donné en nostre chastel de Montluçon, le XI^e jour de decembre, l'an de grace mil CCCC cinquante trois.

Par monseigneur le duc,