1453, 3 août. — Moulins (Château).

Charles, duc de Bourbonnois et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France, a noz amez et feaulx gens de noz comptes a Molins, salut. Savoir vous faisons que par nostre commandement et ordonnance nostre amé et feal tresorier general Jehan Sirot a paié, baillé et delivré des deniers de sa recepte a maistres Pierre Cottet et Geoffroy le Queu, chamoines de l'eglise cathedrale de Saint Julien du Mans et procureurs des doyen et chappitre de ladicte eglise, souffisamant fondez quant a ce comme il nous est aparu par les lettres de procuracion sur ce fectes, la somme de deux cens escus d'or tournois, a la quelle noz amez et feaulx les gens de nostre grant conseil ont traictié et composé avec eulx ou non que dessus pour cause et raison des arreraiges de cinq florins d'or de rente que feu nostre tres redoubté seigneur, ayeul et grant pere monseigneur le duc Loys, cui Dieu pardoint, donna par chascun an pour offrir et faire certain devoir ou hommage par lui ou ses successeurs au glorieux corps saint de monseigneur saint Julian, reposant en icelle eglise, lesquelz devoir ou hommage nous n'avons peu et ne pouvons faire obstant les grans charges et empeschemens que avons euz le temps passé et la maladie que avons de presens, et aussi de LVII l. t. de rente chascun an que nostredit tres redoubté seigneur et ayeul donna en icelle eglise pour la fondacion de certaines messes et services que lesdiz doyen et chappitre sont tenuz de faire dire et celebrer en ladicte eglise chascun jour de l'an. Si voulons et vous mandons que icelle somme de II^C escus d'or courans allouez es comptes et rabatez de la recepte de nostredit tresorier general sanz aucun contredit ou difficulté, en raportant ces presentes, quictance souffisante desdiz maitre Pierre Cottet et Geoffroy le Queu, ensamble la procuracion dont cy dessus est fete mencion tant seulement, car ainsi nous plaist il estre fait, nonobstant quelzconques ordonnances, mandemens ou deffenses a ce contraires. Donné en nostre chastel de Molins le III^e jour d'aoust, l'an mil CCCC cinquante et trois.

Par monseigneur le duc,