1453, 19 juin. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plain des sens, loyaulté, science, prudence, prudomie et bonne diligence, et par le bon rapport et tesmognage qui nous a esté fait de la personne de nostre bien amé Glaude du Says, filz de nostre amé et feal procureur general de Fourez, Pierre du Says, a icelluy avons donné et octroïé, donnons et octroïons de grace especial par ces presentes, ung des offices de greffe de nostre court de Fourez, pour icelluy office avoir, tenir et excercer par ledit Glaude du Says aux gages, droiz, proufiz, prerogatives et esmolumens acoustumés et audit office appartenans, tant qu'il nous plaira. Si donnons en mandement par ces presentes a nostre amé et feal president de Fourez, ou a son lieutenant, que, pris et receu dudit Glaude du Says le serement acoustumé de fayre en tel cas, il le mette et institue, ou face mectre et instituer, en possession et saisine dudit office de greffe, et d'icellui ensemble desdiz droiz, gaiges, proufiz, prerogatives et esmolumens acoustumés, le face, laisse et seuffre joïr et user plainement et paisiblement se il a ce ydoene et souffisant, sans luy faire mectre ou donner aucun destorbier ou empechemens au contraire. En tesmoing de ce, et a plus grant fermeté, nous avons fait mettre et apposer a ces presentes nostre seel. Donné en nostre ville de Molins le XIX^e jour de juing, l'an de grace mil CCCC LIII.

Par monseigneur le duc.