1453, 19 juin. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plain des sens, loyaulté, science, prudence, prudomie et bonne diligence, et par le bon rapport et tesmoignaige qui nous a esté fait de la personne de nostre bien amé Guillaume Martin, habitant de nostre ville de Montbrison, a icelluy avons donné et octroyé, donnons et octroyons de grace especial par ces presentes ung des offices de greffe de nostre court de Fourez, pour icelluy office avoir, tenir et excercer aux gages, droiz, proufiz, prerogatives et esmolumens acoustumés et audit office appartenans, tant comme il nous plaira. Si donnons en mandement par ces presentes a nostre amé et feal president de Fourez, ou a son lieutenant, que, pris et receu dudit Guillaume Martin le serement acoustumé de fayre en tel cas, il le mette et institue, ou face mectre et instituer, en possession et saisine dudit office de greffe et d'icelluy ensemble desdiz droiz, gaiges, proufiz, prerogatives et esmoluments acoustumés, le face, laisse et seuffre joïr et user plainement et paisiblement se il [est^a] a ce ydoene et souffisant, sanz lui faire mectre ou donner aucun destorbier ou empechement ou contraire. En tesmoing de ce, et a plus grant fermeté, nous avons fait mectre et apposer a ces presentes nostre seel. Donné en nostre ville de Molins le XIX^e jour de juing, l'an de grace mil CCCC LIII.

Par monseigneur le duc.