1453, 19 juin. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, ‹a› plain confians des sens, loyaulté, science, prudence et bonne diligence, et par le bon rapport et tesmognage qui nous a esté fait de la personne de nostre bien amé Mathé Geoffroy, hitant de nostre ville de Montbrison, a icelluy avons donné et octroyé, donnons et octroyons de grace especial par ces presentes ung des offices de greffes de nostre court de Fourez, pour icellui office avoir, tenir et excercer aux gages, droiz, proufiz, prerogatives et esmolumens acoustumés et audit office appartenans, tant comme il nous plaira. Si donnons en mandement par ces presentes a nostre amé et feal president de Fourez, ou a son lieutenant, que, pris et receu dudit Mathé Geoffroy le serement accoustumé de faire en tel cas, il le mecte et institue, ou face mectre et instituer en possession et saisine dudit office de greffe, et d'iceluy ensemble desdiz droiz, gages, prouffiz, prerogatives et esmoluments accoustuméz, le face, laisse et seuffre joïr et user pleinierement et paisiblement si il est a ce ydoene et souffisant, sanz lui fere mettre ou donner aucun empeschement ou contrere. En tesmoing de ce, et a plus grant fermeté, nous avons fait mettre et apposer a ces presentes nostre seel. Donné en nostre ville de Molins le XIX^e jour de juing, l'an de grace mil CCCC LIII.

Par monseigneur le duc.