1453, 19 juin. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que nous, confians a plain des sens, loyaulté, science, prudence, prudomie et bonne diligence, et par le bon rapport et tesmoignage qui nous a esté fait de la personne de nostre bien amé Fransois Paparin, hitant de nostre ville de Montbrison, a icelui avons donné et octroïé, donnons et octroïons de grace especial par ces presentes ung des offices de greffe de nostre court de Fourez, pour icelluy office avoir, tenir et excercez aux gages, droiz, proufiz et esmolumens acoustumés et audit office appartenans, tant qu'il nous plaira. Si donnons en mandement par ces presentes a nostre amé et feal president de Fourez, ou a son lieutenant, que, prins et receu dudit Fransois Paparin le serement acoustumé de fayre en tel cas, il le mecte et institue, ou face mettre et instituer en possession et saisine dudit office de greffe et d'icellui ensemble desdiz droiz, gages, proufiz, prerogatives et esmoluments acoustumés, le face, laisse et seuffre joïr et user plainement et paisiblement, si il est a ce ydoene et souffisant, sans lui fayre mettre ou donner aucun destorbier ou empeschement ou contraire. En tesmoing de ce, et a plus grant fermeté, nous avons fait mettre et apposer a ces presentes nostre seel. Donné en nostre ville de Molins, le XIX jour de juign l'an de grace mil CCCC cinquante et trois.

Par monseigneur le duc.