1453, 21 mai. — Moulins (Château).

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que, pour la bonne relation que faicte nous a esté de la personne de nostre bien amé Thomas Poyet, clerc, icellui avons fait, ordonné et estably, et par ces presentes faisons, ordonnons et establissons maistre, gouverneur et adminsitrateur de l'ostel Dieu de nostre ville de Saint Germain Laval, en nostre païs de Fourez, pour et au lieu de messire Jehan Gayardon, prestre, lequel naguerez est alé de vie a trespassement, auquel Thomas Poyet avons donné et octroyé, et par ces presentes donnons et octroyons de grace especial plain povoir, auctorité et mandement especial de tenir et avoir ledit office de maistre, gouverneur et administrateur dudit hostel Dieu, fere et excercer toutes et singulieres choses qui y appartiennent et que a bon et loyal gouverneur et adminsitrateur puent et doyvent appartenir, aux gages, droiz, prouffiz et esmolumens acoustumés, tant comme il nous plaira, et pourveu aussi que ledit gouverneur et administrateur sera tenu de rendre compte et reliqua par devant noz officiers toutes fois qu'il appartiendra. Si donnons en mandement par ces mesmes presentes a noz amés et feaulx balli et juge de Fourez, ou a leurs lieuxtenans, et a chascun d'eux, si comme a luy appartiendra, que, pris et receu dudit Thomas Poyet le serement acoustumé de fere en tel cas et caution souffisant, il le mettent et instituent, ou facent mettre et instituer en possession et saisine dudit office de maistre, gouverneur et administrateur dudit hostel Dieu et d'icellui ensemble desdiz droiz, gaiges, prouffiz et esmolumens dessusdiz, le facent, laissent et seuffrent joïr et user plainement et paisiblement, et a lui obeir de tous en toutes choses touchans et concernans ledit office, en ostant et deboutant tout autre ilicite detenteur d'icellui non ayans noz lettres precedans en date ces presentes, esquelles, en tesmoing de ce, nous avonz fait mettre nostre seel. Donné en nostre chastel de Moulins, le XXI^e jour de may, l'an de grace mil CCCC LIII.

Par monseigneur le duc.