1452, 13 juillet. — Moulins (Château).

Charles, duc de Bourbonnois et d'Auvergne, conte de Clermont et de Fourés, seigneur de Beaujeu et de Chastel Chinon, per et chamberier de France, noz bailly et juge de Fourés, salut. Savoir vous faisons que nous avons donné et octroié, donnons et octroyons de grace especial par ces presentes a nostre bien amé Jehan de Vaulx, clerc, filz de Philibert de Vaulx, une des bourses ou pensions des clerc, fundee par feux de bonne memoire nous trés redoubtez seigneurs et predecesseurs sur nostre prevousté et recepte de Cerviere, laquelle eschevra a la prouchaine feste de Toussaintz, pour ce que ung nommé Jehan de Lestra, filz de Pierre de Lestra, qui a present la tient, sera a terme a ladicte feste de Toussaintz du temps introduit par la fondation desdictes bourses, c'est assavoir de cinq ans entiers une chascune bourse, et laquelle bourse nous, audit Jehan de Vaulx, avons donnee et octroyé pour pitié et aumosne et pour luy aidier a tenir aux escoles, a icelle bourse tenir, avoir et prandre les droiz, proufiz et emolumens appartenans a icelle bourse le temps et terme des cinq annees introduit par ladite fundation. Si vous mandons, et a chascun de vous, si comme a luy appratiendra, que ledit Jehan de Vaulx vous mectez en possession et saisine de ladicte bourse, et d'icelle ensemble des droiz et proufiz et emolumens a icelle appertenans, le fetez, laissez et souffrés joïr et user durant ledit temps de cinq ans commençant a ladicte feste de Toussains prouchainnement venant, car ainsi le voulons et nous plaist estre fait, et audit de Vaulx l'avons octroyé et octroyons de grace especial par ces presentes se mestier est. Donné en nostre chastel de Molins, soubz nostre seel, le XIII^e jour de juillet, l'an de grace mil CCCC cinquante et deux.

Par monseigneur le duc.