1450 (n. st.), 6 février. — Montluçon.

(F. 1r.) Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chastel Chinon, per et chamberier de France, a tous ceulx qui ces presentes lettres verront, salut. Savoir faisons que pour certaines causes et consideracions ad ce nous mouvans, nous avons deschargé et deschargeons par ces presentes lettres Simon Putillot de l'office de recepte de nostre terre et baronnie dudit Chastel Chinon, et, confians a plain des sens, loyaulté, prudomie, suffisance et bonne diligence de nostre bien amé Jehan Tridon, a icellui avons donné (f. 1v.) et octroyé, donnons et octroyons par ces presentes ledit office de recepte de nostredicte terre et baronnie de Chastel Chinon, auquel Jehan Tridon nous avons [donné, par ces] presentes donnons plain povoir [et man]dement especial de tenir et avoir [ledit of]fice, faire et excercer toutes et singulieres choses que y appartiennent, aux gaiges, droiz, [prou]ffiz, honneurs, previleges et prerogatives a icelluy office appartenans, et telz et semblement que avoit et prenoit ledit Simon Putillot, tant comme il nous plaira. Si donnons en mandement par ces mesmes presentes a noz amés et feaulx gens de noz comptes a Molins que, prins et receu dudit Jehan Tridon le serement acoustumé de fere en tel cas, et caucion suffisante, ilz le mectent et instituent, ou facent mettre et instituer en possession et saisine dudit office et d'icellui, et des gaiges, drois, privileges, prerogatives et esmolumens dessusdiz, le facent, laissent et seuffrent joïr et user plainement et paisiblement et prandre et avoir lesdiz gaiges par sa main doresenavant chascun an, comme avoit acoustumé de faire ledit Putillot, et iceulx gaiges lui allouer en ses comptes et rabbatre de sa recepte, par rapportant ces presentes ou vidimus d'icelles fait soubz seaul auctentique pour une fois seulement, en ostant et deboutant dudit office ledit Simon Putillot, et lequel nous en ostons et deboutons par ces presentes comme dit est, car ainsi nous plaist il et voulons estre fait. En tesmoing de ce et plus grant fermeté, nous avons fait mectre et apposer nostre seel a ces presentes. Donné en nostre ville de Molucon, le VI^e jour de fevrier, l'an de grace mil CCCC quarente et neuf. (f. 2r)

Par monseigneur le duc^a.