1447, 10 mai.

(Deperditum)

Et ainsi sembloit estre deu audit Gilles le Tailheur, selon le contenu esdites lectres, la somme de VI^C escus d'or vielz, pour laquelle reste luy fut baillé ung potral d'or appartenant a madame la duchesse ; et despuis icellui seigneur eust mandé ledit Giles le Tailleur pardevant lui en son conseil [au] chastel de Molins, en la presence des gens de son conseil, pour savoir de lui s'il avoit baillé toutes les denrees et marchandises declarees esdites lectres, montans a ladite somme de XVII^CXII escus et demi d'or vielz, lequel eust affermé qu'il avoit bailhé et delivré seulement les denrees et marchandises contenues et declerees en ung rolle de parchemin, montans XIIII^CXLIIII escus et demi d'or vielz, sur quoy lui avoit esté payé, comme dit est dessus, XI^CXII escus et demi d'or vielz, combien que par les lectres dessusdictes sembloit estre deu audit argentier la somme de VI^C escus d'or vielz, pourquoy icellui seigneur, considerant ce que dessus est dit, voulant cellui argentier et receveur general estre payé et contenté de ladite somme de III^CXXXII escus d'or vielz, comme raison estre, actendu qu'il avoit rendu et restitué ledit poitral d'or a icellui seigneur en ses mains oudit chastel de Molins, que icellui seigneur avoit fait mectre en ses coffres et retenu par devers lui, eust par ses lettres donnees en son conseil le X^e jour de may IIII^CXLVII, veriffiees ledit jour, voulu que icellui argentier et receveur general ait et preigne par ses mains des deniers de sa recepte ladite somme de III^CXXXII escus d'or vielz a lui donnee pour les causes dessusdites, et icelle somme estre allouee en la despense de ses comptes et rabatue de sa recepte, en rapportant lesdites lectres avecques les parties d'iceulx draps de soye, de layne et autres marchandises, lesquelles parties sont attachees ausdites lettres soubz le contre-seel, et, avecques ce, par icelles lectres icellui seigneur mande ledit argentier et receveur general estre tenu quicte et paisible d'icellui poitrail qu'il a rendu et restitué, garny de ce qui s'en suit : c'est assavoir de XV baillaiz, neuf saphirs et LXXIX perles de compte, ou champ duquel poitrail a plusieurs rozes esmailhees de blanc, et dedans lesdites rozes a petites sounectes et branlans, et autour dudit poitrail XLIII fueilhes et besans, ouquel poitrail pend deux chaynes d'or garnies de XLVI sonnectes et de trente six petiz besans d'or, pesant icellui poitrail, garny comme dit est, troys mares deux onces demys, et d'icellui poitrail ledit seigneur quicte et descharge ledit argentier et receveur general par lesdites lectres.