1447 (n. st.), 11 janvier.

(Deperditum)

Audit argentier et receveur general, pour certain voyage par lui fait par l'ordonnance d'icellui seigneur partant de la ville de Molins lui deuxiesme et deux chevaulx, le XXV^e jour d'octobre IIII^CXLVI, et en sa compaignie Ferrande, archier d'icellui seigneur, a lui bailhé par ledit seigneur pour aler et venir plus seurement, pour aller en la ville de Paris et illec vendre la quantité de IIII^XXXII tonneaulx de vin que icellui seigneur avoit en son hostel de Bourbon, a Paris, et aussi pour faire faire pour ledit seigneur, par Jacob de Praet, orfevre demourant audit lieu de Paris, ung chardon d'or, ouquel voyage icellui argentier et receveur general, accompaigné comme dessus, et ledit Ferrande en sa compaignie, ont vacqué, tant allant, sejournant audit lieu de Paris pour faire ce que dessus est dit, comme retournant en ladite ville de Molins, par l'espasse de XLVI jours entiers, commancans le XXV^e jour d'octobre IIII^CXLVI et finissant le IX^e jour de decembre ensuivant oudit an, iceulx jours inclus, pour chacun desquelz jours mondit seigneur le duc, par ses lettres, donnees et veriffieez le XI^e jour de janvier oudit an IIII^CXLVI, a tauxé et ordonné audit argentier et receveur general la somme de XX s. t., et audit Ferrande X s. l. pour leur aider a supporter les fraiz et despens, paynes et travaulx dudit voyage, montent iceulx XLVI jour ledit argentier et receveur general et pour ledit Ferrande LXIX l. t., laquelle somme mondit seigneur le duc, par sesdites lettres, mande estre allouee et comptee et rabatue de la recepte dudit argentier et receveur general, en rapportant lesdites lettres et quictance seulement dudit Ferrande de la somme de XVIII l. t., a quoy monte sa porcion dudit voyage.