1446, 5 octobre. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chasteau Chinon, per et chamberier de France, a noz cappitaines chastellains de Molins, Billi et Chaverroche, ou a leurs lieutenans, salut. Receue avons l'umble supplicacion de nostre amé et feal escuïer Phelibert Damas, seigneur de la Bazolle et de Saint Didier, contenant que comme ledit suppliant tiengne et porte en fié et hommaige de nous ses terres et chevances dudit Saint Didier et de La Roche, c'est assavoir ledit lieu de Saint Didier du ressort de noz chastellnies de Molins et de Chaverroche, et ledit lieu de La Roche du ressort de nostre chastellnie de Billy, esquelx lieux ledit suppliant a toute justice haulte, moyenne et basse, mouvant de nostre fié comme dit est, lesquelx lieux sont loings de nosdictes chastellnies de Molins, de Chaverroche et de Billy a huit ou dix lieuxs ou environ, et dit ainsi que pour ce que ledit suppliant n'a esdiz lieux aucune forteresse ou maison fort, les cappitaines desdiz lieux de Molins, de Chaverroche et de Billy ont voulu contraindre les hommes dudit suppliant a venir guecter en nos chasteaulx desdiz lieux de Molins, Chaverroche et Billy, chascun dans la chastellnie dont il est de ressort, et pour ce que les hommes dudit suppliant eussent estre destruiz de faire lesdiz guez en nosdictes chastellenies dont ils sont de ressort pour le grant chemin qui est entre d'eux, japieça ledit suppliant nous fit requeste qu'il nous plaist de exempter sesdiz hommes de faire lesdiz guetz en nosdiz chasteaulx jusques a tel temps qu'il nous plairoit, laquelle exempcion lui avons tousjours octroyee jusques a present, maiz pour ce que encor ledit suppliant n'a forteresse ne maison fort esdiz lieux, nos cappitaines desdiz Molins, Chaverroche et Billy veulent containdre derechief les hommes dudit suppliant a faire ledit guet et reparacion, qui seroit leur totale destrucion vue la distance desdiz lieux, requerant sur ce nostre grace et provision, pour quoy nous, consideré ce que dit est, et les bons et agreables services que ledit seigneur de la Bazolle nous a faitz ou temps passé, fait chascun jour et esperons que encores face ou temps ad venir, a icellui avons octroyé et octroyons par ces presentes de grace especial que ses hommes justiciables desdiz lieux de Saint Didier et de la Roche soient et demeurent quittes et exemps tant comme il nous plaira de faire guet et garde en nosdiz chasteaulx de Molins, Billy et Chaverroche, en payant chascun an par chascun desdiz hommes a nosdiz cappitaines de Molins, Billy et Chaverroche a chascun en tant qu'il lui appartient, ung bichet d'avoyne, mesure du donjon seulement, ou la valeur, pourveu que ce ne nous torne a prejudice ou temps a venir, et que ledit seigneur de la Bazolle en baille telles lettres que par nostre conseil seront advisees estre de faire, affin que sesdiz hommes ne le puissent prendre ne alleguer a consequences ou temps ad venir. Si vous mandons, et a chascun de vous, si comme a lui appartiendra, que de nostre presente gace, exempcion et amoderacion, et du contenu en ces noz lettres, vous faitez, seuffrez et laissez, chascun en son endroit, ledit seigneur de la Bazolle et sesdiz hommes joïr et user plainement et paisiblement, sans contre la teneur de ces noz lettres les travailler, molester ne empescher, ne souffrir estre travaillez, molestez ou empeschez en quelque maniere que ce soit. Donné en nostre ville de Molins le cinq^eme jour d'octobre, l'an de grace mil IIII^C quarente et six.

Par monseigneur le duc.