1446, 26 septembre.

Nous Charles, duc de Bourbonnoys et d'Auvergne, conte de Forestz, seigneur de Beaujeu et de Chastel Chinon, per et chamberier de France, confessons avoir eu et receu pour et ou nom de nostre tres chier et amé filz le conte de Clermont, de Martin Roux, receveur ou hault paÿs d'Auvergne de la porcion de l'aide de II^C XXVI^M f. mis sus par monseigneur le roy en ses paÿs de langue d'oil ou mois de janvier derrenier passé, et aussi des deniers mis sus par les gens des trois estaz dudit paÿs oultre et par dessus le principal dudit aide pour les affaires communs d'icellui paÿs, la somme de deux cens cinquante livres tournois, pour la quarte partie de M f. t. donnees et octroyees a notredit filz par les gens desdiz troys estaz des hault et bas paÿs d'Auvergne, pour les causes contenues et declairees en leurs instrucions faictes et accordees tant pour le fait dudit aide que pour lesdiz affaires communs a l'assemblee par eulx faictes a Esgueperse ou mois de fevrier derrenier passé, de laquelle somme de II^C L l. t., nous nous tenons, pour et ou nom de nostredit filz, pour contens et bien paiez, et en avons quitté et quittons ledit receveur et tous autres. En tesmoing de ce, nous avons signé ces presentes de nostre seing manuel, et fait seeller de nostre seel le XXVI^eme jour du mois de septembre, l'an mil CCCC quarente et six.