1446, 18 septembre.

Nous Charles, duc de Bourbonnois et d'Auvergne, confessons avoir eu et receu de Pierre Mandonier, commis par monseigneur le roy a percevoir ou bas paÿs d'Auvergne la porcion de l'aide de II^C XXVI^M f. que mondit seigneur le roy a ordonné estre mis sus en ses païs de langue d'oil, ou mois de janvier derrenier passé, tant pour le fait de la convencion de la paix comme pour ses autres affaires, la somme de sept cens cinquante livres tournois, laquelle les gens des trois estaz dudit bas païs ont donnee a nostre tres chier et tres amé ainsné filz le comte de Clermont, a icelle avoir et prendre par la main dudit commis des deniers par eulx mis sus oultre le principal dudit aide, pour lui aider a entretenir son estat et afin qu'il ait ledit païs pour recommandé, ainsi que par les instructions faictes par icelles gens des trois estaz a cause dudit aide puet plus a plain apparoir, de laquelle somme de VII^C L l. t. dessudicte, pour nostredit filz, nous nous tenons pour contens et bien paiez, et en quittons ledit Mandonier, et tout aultres qu'il appartient. Donné soubz nostre seel et segne manuel en tesmoing de ce, le XVIII^eme jour de septembre, l'an mil CCCC quarante six.