1445, 14 juillet.

Nous Charles, duc de Bourbonnois et d'Auvergne, confessons avoir eu et receu de Pierre Mandonier, commis par monseigneur le roy a recevoir et faire venir ens ou bas paÿs d'Auvergne la porcion de l'aide de III^C M frans que mondit seigneur a ordonné et voulu avoir esté mis sus en tous ses paÿs de langue d'oil pour ceste presente annee commencent le premier jour de janvier derrenier passé, tant pour le paiement et entretenement de ses gens de guerre qu'il a envoiez vivre hors de son royaume, comme pour autres ses affaires, la somme de sept cens cinquante livres tournois, laquelle les gens des trois estaz dudit bas paÿs ont donnee a nostre tres chier et tres amé ainsné filz le conte de Clermont, a icelle avoir et prendre par la main dudit commis des deniers par eulx mis sus oultre le principal dudit aide, pour lui aider a entretenir son estat et estre plus honnorablement en la compaignie et service de mondit seigneur le roy, si comme par les instructions sur ce faictes par icelles gens de trois estaz puet plus a plain apparoir, de laquelle somme de VII^C L l. t. dessusdicte, pour nostredit filz, nous nous tenons pour contens et bien paiez, et en quittons ledit Maindonier et tous autres qu'il appartient. Donné soubz nostre seel en tesmoing de ce, le XIIII^e jour de juillet, l'an mil CCCC quarante cinq.

Par monseigneur le duc,