1445, 12 juillet.

Nous Charles, duc de Bourbonnois et d'Auvergne, confessons avoir eu et receu de Pierre Maindonier, commis par monseigneur le roy a recevoir et faire venir ens ou bas paÿs d'Auvergne la porcion de l'aide de III^C M frans que mondit seigneur a ordonné et voulu avoir esté mis sus en tous ses paÿs de langue d'oïl pour ceste presente annee commencent le premier jour de janvier derrenier passé, tans pour le paiement et entretenement de ses gens de guerre qu'il a envoïé vivre hors de son royaume¹ comme pour autres ses affaires, la somme de quinze cens livres tournois que les gens des trois estaz d'icellui paÿs nous ont donnee, a icelle avoir et prendre des deniers par eulx mis sus oultre le principal dudit aide, pour nous aider a entretenir nostre estat et mesmement affin que ayons icellui paÿs pour recommandé tant envers mondit seigneur le roy que aussi envers monseigneur le daulphin, ad ce que de son povoir il garde que lesdictes gens de guerre ne viennent loger oudit paÿs, ainsi que par les instructions sur ce fetes par lesdiz gens des trois estaz appert, de laquelle somme de XV^C l. t. nous nous tenons pour contens et bien payez et en quittons ledit Mandonier et tous autres qu'il appartient. Donné soubz nostre seel en tesmoing de ce, le XII^eme jour de juillet, l'an mil CCCC XIV.

Par monseigneur le duc,