1445, 30 juin. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chasteau Chinon, per et chamberier de France. Comme pour faire cesser la pillerie monseigneur le roy ait nagueres cassé partie de ses gens de guerre et l'autre partie qu'il a retenue ait icelluy seigneur ordonné estre logés parmy les bonnes villes, lieux et places de ‹ce› royaulme, et soit ainsi que en faisant les partaiges, distribucions et ordonnances des païs, mondit seigneur le roy eust ordonné estre logés es terres de nous tres chiers et amés cousins, les seigneurs d'Alebret et de Culant, le nombre de six hommes d'armes et douze hommes de trait avecques et selon l'ordonnance des gens de guerre ordonnés et logés au païs de Berry, et pour ce que lesdictes terres sont de nostredit duché de Bourbonnois, a ce n'avons voulu consentir que lesdictes terres fussent contribuables ne subgettes audit païs de Berry ne ailleurs que a nostredit duchié de Bourbonnois, et a ceste cause avons toutes ces choses faictes bien a plain remostrer a mondit seigneur le roy, lequel, bien a plain informé de ce que dit est, a esté et est que soubz le nombre ordonné par icellui seigneur estre mis et soustenu en nostredit païs de Bourbonnois dedans les terres de nozdiz cousins d'Alebret et de Culant soit logé ledit nombre de six hommes d'armes et douze hommes de traits, selon les aultres gens de guerre estant audit païz de Bourbonnois, et esquelles choses, pour obeir a mondit seigneur le roy, avons consenti et consentons, et pour ce fere avons commis et commectons nostredit cousin de Culant, aussi commissere de mondit seigneur le roy, a loger lesdiz six hommes d'armes et douze hommes de trait, ou faire loger par ses commis et depputés, dedans lesdictes terres de nosdiz cousins d'Alebret et de Culant, estre dedans nostredicte duchié de Bourbonois et ressors d'icelle. Si donnons en mandemant par ces presentes a tous noz justiciers, officiers et subgetz que a nostredit cousin de Culant et a ses commis et depputés obeissent et entendent diligement. Donné en nostre ville de Molins, soubz nostre seel de secret en l'absence du grant, le dernier jour de juing, l'an de grace mil quatre cens quarente et cinq.

Par monseigneur le duc.