1445 (n. st.), 10 février. — Moulins (Château).

Charles, duc de Bourbonnois et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France. Comme pour le bien de nous et pour la conservacion de noz droiz, terres et seigneuries de nostredit païs de Beaujeuloiz du cousté de l'empire avons avisé et deliberé de faire renouveller et recongnoistre tous noz fiez, rereffiez^a, hommaiges, souveraineté, ressort et nommees par tous noz nobles, gentilz hommes et vassaulx de nostredit païs, des villes, forteresses, chasteaulx, maisons, estangs, terres, prés, vignes, cens, servis, rentes, hommes, dommaines et autres droiz que tiennent en fié, rereffiez et hommaige, souveraineté et ressort de nous en nostredit païs de l'empire, et, pour ce, nous, souffisament informez et certiffiez des sens, loyaulté, souffisance, preudomie et bonne diligence de noz amez et feaulx escuïer et conseillés Eddouart Rousset, seigneur de Chamieus, et secretaire Philibert Sotizon, iceulx Eddouart et Sotizon, par deliberacion de nostre conseil et pour le bien de nous et de nostre seigneurie et conservacion de noz droiz et dommaine, avons commis, depputez et ordonnez, commectons, depputons et ordonnons par ces presentes comme a ce ydoenes et souffisans a prandre et recevoir les recongnoissances de tous et chascun de nosdiz fiez, rereffiez, hommaiges, ressort, souveraineté et nommees de nosdiz feaulx vassaulx, gentilz hommes et autres de nostredit païs en la partie de l'empire a nous deuz et appartenans tant a cause de nostre segneurie dudit Beaujeuloiz que autrement, et iceulx fiez, rereffiez, souveraineté, ressort, hommaiges et nommees renouvellés et de nouvel par nosdiz feaulx vassaulx et autres tenans de nous comme dit est a fiez, rereffiez, foy^b et hommaiges, villes, places, forteresses, chasteaulx, terres, cens, servis, rentes, seigneuries, justices, maisons, terres, prés, estangs, molins, vignes, dommaines et autres biens et droiz quelxconques fere confesser, recongnoistre et mectre par escript, en fere livres et terriers ainsi qu'ilz devront et chascun d'eulx seront tenuz de faire, et a faire confesser, renouveller et recognoistre a nosdiz feaulx vassaulx et autres tous et chascun leurs servis, cens, rentes directes, recongnoissances, tailles, mains mortes, servitutes^c et autres droiz a iceulx nosdiz hommes, feaulx vassaulx et autres deuz et appartenans quelxconques par tous hommes sers et non sers, tenemenciers et autres estans et mouvans, et que tiennent de nous en fiez, rereffiez, hommaiges, souveraineté et ressort et aussi tous autres quelxconques qui soient et leur appartiennent en quelque maniere que ce soit en nostredit païs de l'empire et dedans noz terres, seigneuries, mendemens, ressors, souverainetés d'icellui pardevant nosdiz commis et telz notaires, ung ou plusieurs, que a ce besoing leur sera et vouldront eslire ou commectre, et iceulx cens, servis, hommes, directes tailles, mains mortes, servitutes et autres droiz dessusdiz, et les confessions et recongnoissances que sur ce se feront a tous et chascun de nosdiz gentilz hommes, feaulx vassaulx et autres, et a un chascun comme lui appartiendra, tout en ung livre et terrier, ou plusieurs livres, terriers, chartrés^d et ententes pour nous, et aussi pour eulx mettre et reddiger ou fere mettre et reddiger par escript receues et signees par lesdiz notaires, c'est assavoir tous ceulx qui se tiendront de nous et de nosdiz fiez, hommaige, souveraineté et ressort, d'une part particulierement, et tous autres qui seront deuz, de l'autre, et de tout fere ou faire fere terriers, chartrés, livres et ententes qui se doubleront et voulons estre doublees et baillees, c'est assavoir l'un desdiz doubles pour nous et estre porté et envoyé par nosdiz commis en nostre chambre de nostre dommaine dudit Beaujeuloiz a Villefranche, et l'autre pour un chascun de nosdiz gentilz hommes, feaulx vassaulx et subgiés et autres a qui appartiendront, aux gaiges, toutesfoiz despens, charges et journees desdiz gentilz hommes, feaulx et vassaulx, desquelx seront contens et paieront raisonnablement nosdiz commis ; et aussi les avons commis pareillement a renouveller, recevoir et faire confesser et recongnoistre tout et chascuns noz cens, servis, tailles, mains mortes, recongnoissances, hommes serfz, servitutes et autres droiz a nous deuz et appartenans en nostredit païs de l'empire, quelque part que ce soit, et pareillement es lieux et terres du Boys et de Reverie a nous avenus par la succession de belle tante la dame de Villars^e, par tous et chascun noz^f hommes serfz, non serfz, tenemanciers, possesseurs et autres et chascun tant comme il sera tenus et devra faire par raison ou yceulx pardevant nosdiz commis et notaires telz que a ce vouldront estre ou commettre ung ou plusieurs fere confesser et recongnoistre et tout mettre et reddiger par escript en chartiés, livres et terriers, ung ou plusieurs, et puis icelles signees et tabellionnees comme besoing sera et appartiendra, porter, mettre ou envoyer feablement en nostredicte chambre de dommaine de nostredicte ville de Villefranche audit Beaujeuloiz, a noz despens et journees qui seront paiees et tauxees a nosdiz commis comme aprés est declairé ; et aussi, se en procedant par nosdiz commis a ces choses et a l'excercice de ceste leur commission ilz treuvent aucuns fiez ou rereffiez, hommaiges, hommes serfz, cens, servis, terres, dommaines ou autres droiz quelxconques estans de noz fiez, rereffiez et hommaiges, lesquelx aient esté venduz, afranchiz ou alienés sans nostre congié et licence, a nostre prejudice et amoindrement de noz fiez, reteffiez, hommaiges et seigneurie, les avons commis a les prandre, retenir, appliquer et adjuger a nostre dommaine et seigneurie, et a iceulx hommes, servis, rentes, servitutes et autres droiz fere confesser et recongnoistre a nous, et aussi les terres, maisons, prés, vignes, estangs, et autres droiz de dommaines et heritaiges se mestier est de nouvel bailler et asserviser^g pour nous, le mieulx et plus prouffitablement que fere se pourra ou devra a servis annuelz pour ce a nous devoir paier dores-enavant, et pour ce aussi lesdiz vendeurs et achateurs fere venir pardevant^h nosdiz commis, mettre en cause, attaindre et traire a emandes et compositions comme fere se pourra et devra par raison et selon les usances et coustume dudit païs de l'empire, et icelles emandes et compositions lever et recevoir sur iceulx, d'icelles donner quittances valables, et, se pour ce debat ou question en advient entre les parties, a les oÿr, en cognoistre, leur fere et administrer tout justice et raison ; et semblalement, se nosdiz comis, en procedant a l'excercice de leurdicte commission, treuvent aucuns chemins publiques, cours d'eaues, lieux, maxⁱ, tenemens et possessions vacans ou hermes^j, iceulx avons commis et com-mectons a les prandre et appliquer a nous et a nostre domaine, asserviser et bailler de nouvel a cens et servis a nous doresenavant a paier au^k prouffit de nous le mieulx que fere se pourra, et, avecques ce, se nosdiz commis treuvent aucuns max, tenemens, terres, heritaiges, possessions, cours d'eaue, chemins ou autres choses et droiz a nous appartenans de nouvel baillé indeuement et au prejudice de nous et de la chose publique, de icelle [chose^l] reprandre, adjuger et appliquer a nous ou lesdiz chemins remettre a l'utilité de la chose publique tant que besoing sera et faire se devra, et icelles choses rebailler et reasserviser aux detenteurs d'icelles ou a autres [asservie… (trou de plusieurs mots)] et^m plus a prouffit que fere se pourra pour nous par raison ; semblablement aussi, se nosdiz commis treuvent aucun chemins publiques, cours d'eaues ou autres choses en nostredit païs prinses ou occuppees par (trou de plusieurs mots) chemins rompuz, bouchez ou foussoyés par aucuns et traversés par cours d'eaues ou autres, nous lez avons commis a les repareiller ou faire repareiller, et ceulx qui les auroient occuppés, rompuz ou procedé a ces choses sans (trou de plusieurs mots) souffisant de nous, les traire et actaindre pour ce en cause, et contre iceulx adjuger et lever emendes a nous raisonnablement ; et aussi, de nouvel, se besoing est, iceulx chemins, cours d'eaues, fossés et autres choses bailler a cens et servis (trou d'un mot) le mieulx que fere se pourra ; et ce aussi nosdiz commis treuvent aucuns noz hommes justicables et subgiez et autres demourans en autre seigneurie du cousté de l'empire qui soient rebelles ou contredisans a contribuer et fere leur devoir avecques les autres noz hommes des lieux, chastellenies et mandemens esquelx sont demourans, tant en guetz et chargues, cappitanages, fortifficacions, reparacions de villes, places, terres et mandemens esquelx habitent et aussi en taux, dons, taillez et subsides comme autrement, les avons commis et commettons a les fere contribuer es choses dessudictes et toutes autres deues et raisonnables, et de leur fair fere tous devoirs comme font les autres ; et aussi pareillement de fere contribuer es choses dessudictes et en toutes autres raisonnables et deues tous autres que trouveront et congnoistront a icelles estre tenus tant pour raison de leurs personnes et biens comme autrement, ainsi que devront fere et seront tenus par raison ; et, oultre ce, se nosdiz commis treuvent aucuns qui aient commis aucunes calompnies ou decepcions es pris et achaps d'aucunes choses estans de nostre directe ou qui aient celléⁿ ou retenu les los et ventes pour ce a nous deuz et appartenans, et tous a ce adherens et consentans, a les en traire en cause et fere venir par devant eulx, et pour ce avons adjugier emandes sur eulx deuez raisonables^o ; et, avecques ce, les avons commis que tous les notaires dudit Empire, noz jurez et subgiés, qu'ilz trouveront avoir receues lettres ou instrumens en nostredit païs sans y adjouster le seelle de nous, ou qui les auront expediees et rendues aux parties sans fere seeller et payer l'emolument de nostre seel et qui n'auront aussi enregistrees toutes leurs lettres et contraulx en prothecolles, d'eles en actaindre et traire en emandes et compositions, et icelles lever d'iceulx en rapportant tout ce que par eulx sera fait par devans noz officiers en nostre chambre des comptes et la ou il appartiendra, ensemble l'emolument de nostre seel et autres droiz a nous appartenans ; et en ce que touche ledit^p Eddouart Rousset, l'un de nosdiz commis, avons commis et commectons ledit Sotizon seul et pour le tout a fere les choses touchant et concernant ledit Rousset comme dessus ; ausquelx nos commis a fere, excercer et excecuter les choses dessusdictes et chascune d'elles leurs circonstances et deppendences quelxconques, avons donné et octroyé, donnons et octroyons par ces noz presentes, auctorité, pouvoir, commandement et mandement especial en obstant de ces choses, et deffendont tout entremise et cognoissance a tous autres noz justiciers, officiers et gens quielx qu'ilz soient ; et avecques ce avons donné et octroyé puissance et auctorité a nosdiz homes de contraindre et compeller pour les choses dessusdictes toutes et chacunes leurs circonstances et deppendences, toutes et chacunes selon ce que un chascun touchera par prinse, saisine et nostre mains mise de leurs biens, prise, detencion, arrest et enprisonnement de leurs personnes, multes somacions, adjudicacions et lieues de peines, confiscacions et adjudicacions de leurs biens, et mesmement de ceulx qui tiendront en fié, rereffié et hommaige de nous ou autrement, et par toutes autres voyes les plus fortes que pourront ; lesquelx aussi noz commis pour ces choses fere et executer auront et prandront et chascun d'eulx de nous tant pour journees comme despens pour chascun jour qu'ilz entendront et besougneront pour nous es choses dessusdictes et leurs circonstances qui nous touchent, tant seulement la somme de quinze soubz tournoys^q que leur voulons et ordonnons estre payee sur les deniers de leur recepte que feront sur ce, ou autrement sur les deniers de noz receptes de par dela, ensemble les grosses^r et escriptures qui se feront par lesdiz notaires de nosdiz cens, servis et autres drois selon raisonnable tauxacion qui se fera d'icelles par nostre amé et feal conseiller le juge dudit Beaujeuloys, a ce commis par nous. Si mandons, commandons et etroitement, enjoignons par sesdictes presentes a noz amez et feaulx conseillers les bailli, juge, maistre des eaues et fourests, procureur, tresorier, cappitaines et gouverneurs de places, villes et chasteaulx, chastellains, prevostz, receveurs, chassipolz, sergens et a tous autres noz justiciers, officiers et subgiés de nostredit païs de Beaujeuloiz et aussi a tous autres a qui appartiendra que es choses dessusdictes, leurs circonstances et deppendences quelxconques a nosdiz commis et depputés obeissent et entendent en ceste partie, baillent et delivrent noz presens, donnent conseil, confort et aide se mestier leur est, sans contredit ou difficulté, en leur deffendant pas cesdictes presentes que esdictes choses ne s'entremettent aucunement, donnent empeschement, destorbier ou retardament quelxconques a nosdiz commis en quelque maniere que ce soit, en tant qu'ilz doubtent encourir nostre indinacion faisant le contraire, car ainsi nous plaist il et voulons estre fait, nonobstant quelxconques lettres subreptices impetrees ou a impectrer a ce contraires. Donné en nostre chastel de Molins le X^eme jour de fevrier, l'an de grace mil quatre cens [quarante^s] et quatre.

Par monseigneur le duc en son conseil.