1443, 25 octobre. — Moulins.

Charles, duc de Bourbonnois et d'Auvergne, conte de Clermont et de Fourez, seigneur de Chasteau Chinon, per et chamberier de France, a nos amés et feaulx gens de noz comtes, seneschal de Bourbonnois et a tous noz autres justiciers et officiers ou a leurs lieuxtenants, salut.

Savoir vous faisons que aujourd'huy notre amé et feal Jehan de Bar au nom et comme procureur de Beatrix Gniote souffisament fondé en lettres de procuration nous a faiz les foy et hommaige que tenu nous estoit de fere de tout ce qu'il tient et peut tenir en fief de nous en notredit païs et duché de Bourbonnois et ressort d'icellui, et nous a juré et promis de tenir et acomplir toutes les choses contenues es chapitres de fidelité vieulx et nouveaulx, ausquelz foy et hommaige nous ledit Jehan de Bar nommé procureur d'icelle Beatrix Gniote avons receu sauf et reservé droit de retenue s'il y eschet et tout autre a nous et autruy appartenant.

Si vous mandons et a chacun de vous si comme a luy appartiendra que ladite Beatrix Gniote^a a cause desdits foy et hommaige, vous ne molestés, ne empeschés, ne souffrés estre molesté en aucune maniere, ains si aucuns des ses biens estoient pour ce prins, saisi et arresté ou empesché les luy mectés ou faictes mectre ces lettres veues a plaine delivrance pourveu qu'il baillera sa nommee et denombrement de ce qu'il tient en fief de nous en notre chambre des comptes dedans quarante jours prochains venans.

Donné en nostre ville de Molins soubz notre seel de secret le XXV^e jour d'octobre l'an de grace mil CCCC quarante et troys.