1443, 24 octobre. — Moulins.

Charles, duc de Bourbonnois et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France, a nos amés et feaulx gens de noz comptes, seneschal de Bourbonnois et a noz autres justiciers et officiers ou a leurs lieuxtenants, salut.

Savoir faisons que aujourd'huy notre bien amé escuyer Jehan de Meschatain, filz et premier né de Lorin, son père, nous a fait les foy et homage qu'il nous est tenu de fere de tout ce qu'il tient et peut tenir en fief de nous en notre païs et duché de Bourbonnois et ressort d'icellui, et nous a juré et promis de tenir et acomplir toutes lez choses contenues es chapitres de fidelité vielz et nouveaulx, ausquelz foy et homage nous ledit Jehan de Meschatain pour sondit pere y avons receu saul et reservé droit de commise et de retenue s'il y exchiet et tout autre droit a nous et autruy appartenent.

Si vous mandons et a chacun de vous si comme il lui appartient que le dessus nommé a cause desdits foy et homage, vous ne molestez, ne empeschiez, ne souffrez estre molester ne empeschiez en aucune maniere, ains se aucuns des ses biens estoient pour ce prins, saisi, arrestez ou empeschiez lez luy mecttez ou faictes mettre ces lettres veues a plaine delivrance pourveu qu'il rendra et baillera sa nommee et desnombrement de ce qu'il tient en fief de nous en notre chambre des comptes dedans quarante jours prochains venans.

Donné en nostre ville de Molins le XXIIII^e jour d'octobre l'an de grace mil CCCC quarante et troys.