1442, 2 décembre. — Moulins.

(F. 5v.) Charles, duc de Bourbonnois et d'Auvergne, comte de Clermont et de Forestz, seigneur de Beaujeu et de Chasteau Chinon, pair et chamberier de France, a tous ceuls qui ces presentes lettres verront, salut. Comme pour [sovoir^a] a la garde, reparacion, tuition et deffence de nostre ville de Montbrison que avons (f. 6r.) aydé, et par nostre commandement et ordonnance noz bien aymés les consulz et bourgeois et habitants d'icelle ont de nouvel [protegee^b], cloturee et fortiffiee, en quoy ont frayé et taxé grand partie de leurs biens et chevances, et encores despensent chascun jour au paraschevement, closture et fortifficacion, qui est tres grande et spacieuse, pour couvrir, retennir et seurment demourer grand nombre de noz subjiez et autres de noz circumvoisin au bien de nous, de nostredite ville et de tout nostre paÿs de Forestz dont elle est chef et principalle chef, et, affin que iceulx bourgeois et habitants eussent meilleur vouloir de perseverer et continuer en ladicte fortifficacion et closture, entre autres choses eussions promis esdiz habitans d'acroistre et augmenter nostredit mandement et chastellenie de Montbrison de cent feuz et hommes les justices, guet, garde, reparacion, rentrant et contribuables a toutes autres subvencions que font les autres anciens habitants de nostredit mandement et chastellenie de Montbrison, et pour iceulx cens hommes choisir et eslire en noz autres mandemens circumvoisins qui moins son parcourus, passés et au moins dommageable pour lesdiz mandemens, et plus aydan et profitable pour nostredicte ville de Montbrison, eussions commis noz amez et feaulx chevalliers et conseillers messire Aimé Vert, bailly, Loys de la Vernade, juge, et maitre Anthoine Perrin, advocat fiscal en nostredit paÿs et conté de Fourez, lesquels [?] (f. 6v.) nous ont rapporté et relatté par leurs lettres et certificacions attachees a ces presentes soubz nostre contre seel, estre le moins dommageable pour nous et plus profitable et ayde pour bourgeois et habitans de nostredite ville de Montbrison, lesdiz cens feuz et hommes de justice es lieus et par la maniere que en suit, c'est assavoir André Roug, d'Augierre, Anthoine Peynot et Estienne Jobees du lieu et vialage de Coussangue, Laurant Bayee le Daubrue, Laurant et Estienne de la Goutte, Pierre Francoye, Jean Porchon, Anthoine Ayeulx, Jean Taillaut, Jean Dagier et Jean Fouveux de Thenevous, Jean Guyton, Jean Bonnet, Robert du Prie, Jean Brogue et Jean Dea, rivereins du lieu et vialage de Morraud, Aliain Proivert, Jean Feroille et Barthelliemy Breoy, du lieu et vialage de Perreux, Pierre Maitz et Anthoine du Chier, du lieu du Treul, Louyse du Bose, Louyse Besson, Pierre Villon et Jean Obert, du lieu et vialage de Messierre, Mathieu Sarrinbeault, Pierre Poyars, Louye Revel et Benoist Seguin, du lieu et vialage du Poyet, Mathieu Bresson, Martin Bresson, Francois Duzor, Pierre Plavy et Jean Plavy, du lieu et vialage d'Usore, Jacques Sasson des Pol, Pierre Couzaud, Pierre Pouiet et Anthoine Pouiet, du lieu et vialage de les Buissoniers, André Pijeaud, Anthoine Pijeaud, Jean Pyrard et Jacques Peguer (f. 7r.), du lieu et vialage d'Aveus, Pierre de Combtre, Pierre de la Grange et Anthoine Archambose, du lieu et vialage de Tizezy, George Bourdes, Alain Daignet et André Vial, des lieux et villages de Bessier et Pralong, et Guillaume Bergier de la parcelle de Mornaud, Robert Bergier de la parcelle de Mornaud, Robert Bergier, Jean Siron, Jean Roy du lieu et vialage de Champ, Estienne Sauvaing, Mathieu Tric, Thomas du Troing et Jean Vernin du lieu et vilage du Vronig, et Jean Durant, Mathieu Brumel, Jean Brumel et Jean Deurdur du lieu et vialage de Glisiere, Pierre Blanc, Jean Carton, Jean Compte et Estienne Sovin du lieu de Mouvadon, Pierre de la Grotte et Simond de la Grotte, dudit lieu et vialage de la Grotte, Pierre Vrollin et Jean Mosier de la Sogien et Jean Durne, Jean Mavin, Mathieu Guette, Mathieu Deocreux, Pierre Astier, Pierre Goraud, Anhoine Faure, Vial Rolland et Pierre Segin du lieu et vialage de Roche, André Petial et les hoirs Jean Archaud du lieu et vialage de Montrages, Jean de Buneoz, Simond Thevenon, Mathieu Gruot et Jean Arnaud, du lieu et vialaige de Buichet, item Jean Tachier, Jean Bay et Anthoine Faure, André Segere et Pierre Tardu, du lieu et parcel de Loingmieu, Mathieu Fogerre, Jean Paiguo, Jean de Vaulx et Anthoine Paigne du lieu et vialaige de Travesy, Jean Jambin des Crozet, Mathieu Toiron, Vial Morel et Estienne Farge, du lieu et vialage du Mas, Jean Baschollier de la Rochette et Jean Jambin de Chavassiere, qui sont en nombre lesdiz cens hommes et subjets ; savoir faisons que (f. 7v.) nous, ayans la relation de nosdiz commissere en cestes partie ferme et agreable, et vollons nostre promesse, ordonnance et appoinctement sortir son effect, iceulx cent feuz et hommes de justice dessus declairé, avons adjouxtés et annexés et par ces presentes adjouctons, donnons et annexons en nostredit mandement et chastellenie de Montbrison, pour l'augmentacion et accroissement d'icelluy, pour y gueter, reparer et contribuer a charrois et maneupvres et reparacion et autres subvencions, qu'ilz faisoient chascun en droit soy en noz mandement et chastellenyes de Marcilly le Chastel et Chasteauneuf, dont ilz estoient au paravant, desquelz les avons separé, osté et exempté, et par ces presentes les en separons, ostons et exemptons perpetuellement pour estre et demeurer a tousjours mais doresenavant de nostredicte chastellenie et mandement de Montbrison, et contribuer tant en justice guet, garde, reparacion et autres subvencion que sont et ont acoustumé de faire contribuer noz autres hommes et subjects de nostredit mandement. [Si donnons en mandement^c] par ces mesmes presentes a noz amés et feaulx gens de noz comptes, bailhi et juge de Fouresz, capitaine et chastellain de Marcilly le Chastel et Chasteleneuf, et a chascun d'eulx, comme a luy appartiendra, que les feuz et hommes dessus nommez et declerés ostent et separent chascun en son endroit desdiz mandement et chastelenie de Marcilly et Chastelneuf et iceulx mettent et delaissent de tout en tout doresenavant de nostredit mandement (f. 8r.) de Montbrison, pour y estre et demourer perpetuellement et contribuer ausdiz guet et garde, reparacion et autres subvencions que font les autres anciens hommes et subjects de nostredit mandement de Montbrison, sans ce qu'ilz soient tenus de contribuer a lever en quelle maniere que ce soit, car ainsi nous plaist il et voullons estre fait par ces presentes, desquelles, en tesmoin de ce, avons fait mectre nostre seel. Donné en nostre ville de Mollins, le second jour de decembre, l'an mil [quatre cent quarante deux^d].

Par monseigneur le duc en son conseil, auquel le seigneur de la Fayette, mareschal de France, le bally de Forestz, Loys de Segrie, maistre Pierre de Carmone, Jean de la Viste et autres estoient.