1442, 28 août. — Aigueperse.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu et de Chasteau Chinon, per et chamberier de France, a noz bailli, capictaine chastellain, procureur et autres officiers de Chastel Chinhon, ou a leurs lieutenant, salut. Comme il soit venu a nostre cognoissance que puis nagueres ung nommé Reymond Guillemere ait acquis et achapté des heritiers de feu Guillaume Boisseau, de la ville d'Ostun, certaine terre et chevance mouvans de nostre fief appellee la terre de Surpalis, pour certains pris decleré au contraulx sur ce fait, nous vous mandons, et a chascun de vous, si come a luy appartiendra, que icelle terre et chevanche retenés et mectés en nostre main pour droit de retrait a nous appartenant par puissance de fiefz, et icelle baillés, transportés et deslivrés a nostre bien amé Loys Tart, nostre receveur de Chastel Chinon, en païant et restituant audit Reymond achapteur les deniers contenus audit contrauct et tous autres frais resonables, [et a nous les los et ventes ou quict denier^a] que nous en appartient, car ainsi nous plaist et volons estre fait, et audit Loys Tart l'avons octroyé de grace especial par ces presentes. Donné Aigueperse^b le XXVIII^e jour d'aoust, l'an de grace mil CCCC quarente deux.

Par monseigneur le duc.