1440, 2 mai. — Moulins.

Charles, duc de Bourbonnais et d'Auvergne, conte de Clermont et de Forez, seigneur de Beaujeu et de Chastel Chinon, per et chamberier de France, a noz amez et feaulx gens de noz comptes a Moulins, salut et dilection. Savoir vous faisons que pieça, par nostre commandement et ordonnance, nostre amé et feal argentier et nagaires receveur general de noz finances extraordinaires, Gilet le Tailleur, a payé, baillié et delivré des deniers de sadicte recepte generale la somme de trois cent quatre vins quatorze escus d'or aïant cours a present, a nostre tres chier et tres honnoré frere le roy de Sicille et Jehusalem, sur et en deduction de la somme de cinquante mil escus en quoy estions tenuz a luy a cause de mariage de belle fille de Calabre, comme vous apparra par la quittance sur ce fete par nosredit tres honnoré frere, pour quoy nous voulons et vous mandons expressement par ces presentes que par rapportant icelles et la quittance dessusdicte tant seulement, vous, icelle somme de trois cens quatre vins et quatorze escus d'or, allouez es comptes et rabatez de la recepte dudit Gilet du temps qu'il a excercé ledit office de receveur general de nosdites finances extraordinaires, sans aucun contredict ou difficulté, nonobstant quelzconques ordonnances, mandements ou defenses ad ce contraires. Donné en nostre ville de Moulins, le second jour de may, l'an de grace mil CCCC et quarante.

Par monseigneur le duc, le seigneur d'Appinac present,