1439, 6 mai. — Le Puy-en-Velay.

Charles, duc de Bourbonnois et d'Auvergne, conte de Clermont et de Fourez, seigneur de Beaujeu, de Chasteau-Chinon, per et chamberier de France, a tous ceulx qui ces presentes lettres verront, salut. Scavoir faisons nous avoir esté exposé de la partie de nostre feal et amé escuïer Guillaume Saunier, du lieu de Merqueures en la chastellenie de Saint Privat^a, en nostredit païs et duché d'Auvergne et ou diocese du Puy, que, comme il ait ung hostel audit lieu de Merqueures, ouquel il ne se oze ne peut seurement tenir ne demourer, luy, son mesnaige et biens, pour le passaige et parcours de gens d'armes et de trait qui souvent courent et traverssent icelle marche, y faisant plusieurs griefz et oppressions, mesment que ja pieça feu Bertrand Saunier, prebstre, en son vivant tuteur et gouverneur des enfans pupilles [d'aucun^b] des predecesseurs dudit exposant, fu par certains larrons occis et mis a mort oudit hostel, et, depuis quinze ans en ça, Archambaut La Roque, capitaine de gens d'armes, et ses complices, par force et violence prinrent et forcerent ledit hostel et, aprés, y mirent le feu, si que il fu du tout ars et bruslé^c, excepté la muraille seulement, et, pour ce, ledit Guillaume Saunier, afin de garder et sauver luy, son mesnaige et biens des inconveniens dessudiz et autres semblables et eminens perils qui luy pourroient ad venir, nous a humblement supplié et requis qu'il nous pleut luy donner congié et licence de fortiffier et emparer sondit hostel de Merqueures de murailles, tours, creneaux, pons leveis et autres fortiffications, pour soy y retirer, sondit mesnaige et biens, et autrement sondit hostel pourroit venir en ruine et perdition totale, lequel hostel mesmement autrefois a esté fortiffié par le congié des seigneurs de Montlaur^d, de Saint Valier^e et autres qui, ou temps passé, ont esté seigneurs dudit lieu de Saint Privat, et par ce moyen est icelluy hostel presque en estat de deffence, nous, inclinans a la supplication et requeste dudit Guillaume Saunier, pour obvier aux inconveniens dessusdiz et pour consideration des bons et agreables services que lui et ses predecesseurs ont faiz a nous, et aussi nous fait de present ledit Guillaume, et espere que encores face ou temps a venir, a icelluy avons donné et octroyé, donnons et octroyons par ces presentes de grace especial, congié et licence de fortiffier et emparer sondit hostel de Merqueures de murailles, tours, creneaux, pons leveis, fossés, eschisses, barbecannes, cannonieres et toutes autres fortiffications a ce pertinens et necessaires, le mieux et le plus convenablement que fere se pourra et bon luy semblera, pourveu toutesfois que ce soit sans prejudice de nous, nos subgiez et d'autrui, et sans diminution des guet, garde, reparations et autres choses a nous appartenans et que les manans et habitans dudit lieu de Merqueures, se aucuns en y a de present ou auroit en temps a venir, ne laissent a faire guet et garde es anciens lieux et forteresses ou ilz ont acoustumé et soient tenus de faire, senon que ce fut du gré et consentement de celluy ou ceulx a qui la chose toucheroit. Si donnons en mandement par ces mesmes presentes a nostre seneschal d'Auvergne, ou a son lieutenant, que de nostre presente grace, congié et licence, face, laisse et souffre ledit Guillaume Saunier joïr et user plainement et paisiblement, sans le molester ou empescher, ne souffrir estre molesté ne empesché en aucune maniere au contraire. En tesmoing de ce, nous avons fait mettre nostre seel de secret a ces presentes, en l'absence du grant. Donné au Puy, le sixiesme jour de may, l'an de grace mil quatre cens trente et neuf.