1439 (n. st.), 9 mars.

Charles, duc de Bourbonnois et d'Auvergne, conte de Clermont et de Fourés et seigneur de Beaujeu et de Chastel Chinon, per, chamberier de France, au premier nostre sergent qui sur ce sera requis, salut. Nous te mandons et commandons, en commetant si mestier est, que, appelés ceulx qui seront a appeller, tu maintiengnes, gardes et deffendes de force d'armes, de puissance de lays, de molestacions, inquietacions, epparcessions violantes et de toutes autres nouvelletés indeues, quelles que eles soyent, Pierre Varenier, Douce Mayole sa femme, Guillaume Varenier et Katherine, sa femme, et un chascun d'eulx, tant comunectement que divisiement, en toutes leurs justes possessions, farmes, droiz, franchises, usaiges et libertés esquelx tu les trouverés estre, celui ou ceulx dont ils ont cause, avoir esté paisiblement et d'anciennetté, en promectant et pesant noz branchons ou penonceaulx signés a noz armes a la conservacion de leur droit tant seulement, et avecques ce faire joïr et payer deuement les dessudiz de tous leurs debtes, cens, censsives, rentes, tailles, corvees, merciages et autres devoirs deus, congneuz et souffisant prouvés et qui te apperons a eulx estre deuz par lettres, teriers, instrumens, tesmoings, confessions de partie ou par autres justes et loyaulx enseignemens, en contraignent a ce tous leurs debteurs et chascun d'eulx par prinse, vente et explettacion de leurs biens, arrest, detencion et emprisonnement de leurs propres corps se mestier est, et a ce sont obligiez, et en cas d'opposicion au regart de nostre maintenue et garde de la chose contencieuse prinse et mise en nostre main comme souveraine, nonobstant toutes autres mains mises ou branchons, conservacion mis en iceulx, lesquelx tu lieves et ostes et nous par ces presentes levons et ostons affin de debat, seulement et au regart des debtes nostre main souffisant tenue, garnie, prevenente avant toute oeuvre quant es obligez soubz nostre celle, donne et assigne jour certain et compettant es oppesans, comparucion par devant nostre seneschal de Bourbonnois ou son lieutenant, celui ou ceulx de noz juges ou leurs lieuxtenans ausquelx la congnoissance en appartiendra, pour venir dire et soustenir les causes de leurs opposicion, proceder et avant sur ce et en oultre si comme de raison sera, car de ce fere en certiffiant et souffisant nosdiz juges et leurs lieuxtenans de ce que fait avons deuement te donnons pouvoir, auctorité et mandement especial. Donné soubz le seel de nostre chancellerie de Bourbonnois, le IX^e jour de mars, l'an de grace mil quatre cens trente et trente^a et huit avant Pasques.

Par monseigneur le duc a la relacion du conseil,