1409, juillet. — Montluçon.

Loÿs, duc de Bourbonnois, conte de Fourez, baron et seigneur de Beaujeu, per et chamberier de France. Savoir faisons a tous presens et a venir que en l'onneur et louenge de Dieu et de la benoite Vierge Marie sa mere, de monseigneur saint Pierre et de toute la court celestial, et pour le remede et salut des ames de nous et de nostre tres chiere et tres amee compaigne la duchesse, de nostre tres chier seigneur et pere que Dieux absoigve et des autres nos predecesseurs et aussi de noz enffans et successeurs, nous avons fondé, institué et ordonné, et par ces presentes fondons, instituons et ordonnons doresenavant perpetuelment trois messes chascun an a tousjours mais en l'eglise et prieuré de Saulx², assis en nostre chastellenie de Montluçon, en laquelle eglize le prieur dudit prieuré qui est de l'ordre de Saint Augustin et chanoine regulier et ses successeurs prieurs dudit lieu seront tenu de chanter et celebrer chascun an a tousjours maiz trois messes a haulte voix solempnelment, dont l'une se chantera et celebrera de requien et des mors chascun an le dix et neufyesme jour du mois de septembre, auquel jour nostredit seigneur et pere trespassa de ce siecle a la bataille de Poitiers, et l'autre messe sera celebree du Saint Esperit par ledit prieur chascun an le premier lundi de l'an, et sera tenu ledit prieur de faire especialle memoire et commemoracion de nous et de nostredit seigneur et pere et de nos predecesseurs, et l'autre messe sera celebree lendemain de la feste de la annunciacion de Nostre Dame de mars, pour et en remuneracion desquelles chouses et par la continuacion perpetuelle d'icelles et affin que tousjours soions participans et acueilliz es prieres et bienfaiz de ladicte eglise, nous avons donné et octroyé et par ces presentes donnons et octroyons de grace especial audit prieur de Saint Pere de Saulx et a ses successeurs prieurs dudit lieu pour chascun an doresenavant perpetuelment six sextiers de blé de rente, moitié soigle et moitié froment a la mesure dudit lieu de Montluçon, qui seront paiez chascun an auditt prieur et a ses successeurs prieurs dudit lieu par nostre receveur de Montluçon au terme de la Saint Michiel, et parmi ce ledit prieur de l'auctorité de son prelat obligera souffisament lui et son temporel et ses subcesseurs prieurs dudit lieu en la chambre de noz comptes a Molins de faire et celebrer bien et solempnelment doresenavant les trois messes dessus dictes chascun an aux jours et par la maniere que dit est. Si donnons en mandement par ces presentes a nostre receveur de Montluçon present et qui pour le temps ad venir sera que iceulx six septiers de blé paié, baillé et delivré chascun an doresenavant a tousjours maiz audit prieur de Saulx et a ses successeurs prieurs dudit lieu au terme et a la mesure dessus dicte sans aucun contredit ou reffus car par rapportant vidimus de ces lettres pour la premiere fois seulement et quictance dudit prieur sur ce, il nous plaist iceulx six septiers de blé estre allouez es comptes et rebatus de la recepte dudit receveur par nos amez et feaulx gens de nos comptes a Molins, ausquelz nous mandons que ainssy le facent et que enregistrent ces presentes en la chambre de nosdis comptes a Molins en recevant dudit prieur l'obligacion souffisante dessus dicte de celebrer lesdictes messes par la maniere que dit est. Et affin que ce soit ferme chose et estable a tousjours maiz, nous avons fait mectre nostre seel a ces presentes, sauf en autres choses nostre droit et l'autruy en toutes. Donné a Montluçon, ou mois de juiller, l'an de grace mil quatre cens et neuf.

Par monseigneur le duc, vous³ et maistre Pierre de Chantelle⁴, present⁵.