1409, 18 juin. — Moulins.

Loÿs, duc de Bourbonnois, conte de Fourez, baron de Beaujeu, per et chambarier de France, a nostre amé et feal chevalier messire Phelibert de Coture, nostre bailli de Beaujeulois¹, salut. Nous sumes informé suffisement que Anthoine du Balmay, escuyer, a fait et commis pluseurs pilleries, desobeissances, oultraiges, excés, crimes et deliz en nostre païs de Beaujeulois tant ou royaume comme en l'empire dont il n'a esté faicte aucune punicion ne justice, si vous mandons et injoignons expressement en commettant se mestier est que le dit Balmay en quelque part que le povois trouver hors lieu saint, a force d'armes et autrement tellement que la puisance et honeur en soit a nous, vous pranés et faictes prandre et mener en noz prisons et de lui faictes la justice sanz delay qui appartiendra selon ses demerites, pilleries, crimes, excés et delis dont vous justiffiera nostre procureur de Beaujeulois, de ce fere vous donons pouvoir, auctorité et mandemant especial. Mandons aussi et commandons a tous noz officiers, justiciers et subgiés nobles et autres de quelques condicion qu'ilz soient que en ce faisant a vous et a voz commis et deputés baillent prisons et donnent confort et ayde se mestier en avés et requis en sont. Et en oultre nous donnons en mandement a nostre amé tresorier de Beaujeulois Jehan de Bar que la despense qui pour ce raisonnablement sera faicte il paye et fine des deniers de sa recepte et par rapportant certifficacion de vous avec ces presentes ou vidimus d'icelles nous volons et mandons a noz amés et feaulx gens de la chambre de noz comptes en Beaujeulois ladicte despense estre alloee en ses comptes et rabatu de sa recepte sanz contredit. Donné en nostre chastel de Molins, le XVIII^e jour de juing, l'an mil quatre cens et neuf.

Par monseigneur le duc, vous present.