1409 (n. st.), 24 janvier. — Moulins (Château).

En nom du Pere et du Filz et du Sainct Esprit, amen. Nous Loÿs, duc de Bourbonnois, considerans la fragilité d'umaine creature et que nulle chose en ceste mortele vie n'est plus certaine de la mort ne plus incertaine de l'eure d'icelle, desirans de tout nostre cuer quand il plaira a nostre Createur de nous appeller de ceste mortele vie nous rendre a lui en l'estat de bon, vray et loyal crestien, faisons et ordonnons nostre testament et derreniere volunté en la forme et maniere qui s'ensuit. Premierement pour ce que tout le cours de nostre vie avons eu et encores avons ferme esperance et propos d'avoir tousjours tres parfaicte et ferme creance en la glorieuse et benoite Trinité de Paradis, Pere et Filz et Saint Esperit, et a la tres doulce et glorieuse Vierge Marie en laquelle le benoit Filz de Dieu, nostre Sauveur, pour nostre redempcion, voult prandre char humaine, et aussi a toute la benoite court celestial de Paradis, nous recommendons devotement nostre ame a ycelle glorieuse Trinité en laquelle avons tres parfaicte et ferme creance, en lui suppliant que, quant l'eure de nostre trepas avendra, qu'il lui plaist par sa misericorde la recevoir benignement en la compaignie d'icelle glorieuse Vierge et mere du doulx Jhesus, de tous les benois angles, sains et sainctes de Paradis. Item protestons que nous croyons fermement la foy catholique de Jhesu Crist et tous les articles d'icelle en la forme et maniere que nostre mere saincte Eglise a ordonné que bon crisptian le doit faire, et en ceste creance voulons vivre et mourir. Quant au fait de l'Eglise, nous croions fermement l'article In unam sanctam ecclesiam catholicam. Quant au fait touchant ceste doloureuse division, nous protestons que onques ne feusmes, ne sommes, ne serons au plaisir de Dieu en riens obstinez, mais du tout nous rapportons a la verité et a la determinacion de nostre mere saincte Eglise. Et eslisons nostre sepulture en l'eglise conventual du prioré de Sovigny et y voulons gesir et estre apportez de quelconque lieu que nous alons de vie a trespassemens, se bonnement il se puet faire et que nostre sepulture et remembrance soit faicte en la dicte eglise, et de ycelle parfaire et acomplir chargons noz executeurs ci dessoubz nommez par le conseil et ordonnance de nostre tres chiere et tres amee compaigne la duchesse. Item nous ordonnons tous noz forfaiz estre amendez et noz debtes paiees, tant ceulx qui ont esté faiz de nostre temps comme ceulx du temps de feu nostre tres chier seigneur et pere dont Dieux ait l'ame, et que toutes prinses, tant de blez comme vins et chevaulx, soyent paiez, et qu'il soit crié generalement par tout nostre païs et lieux solennelz et par tout le royaume es lieux et contrees ou aurons fait aucune demourance ou despense, que toutes personnes a qui nous pourrons estre tenuz pour les causes dessus dictes viengnent par devers les executeurs de nostre testament, et se ilz pevent monstrer leurs forfaiz par lettres, tesmoings ou autres enseignemens, qu'ilz leur soient amendez et paiez, et si non et ilz sont gens dignes de foy, qu'ilz en soient creu par leur serement. Et de ce nous en chargons noz heritiers par l'ordonnance de noz executeurs, et a ce faire et acomplir nous voulons et ordonnons par ce present testament que, tantost aprés nostre trespas, la chastellenie de Montluçon¹ et toute la revenue d'icelle et la terre de Combraille et celle de Chastel Chinon² demeurent en la main de noz executeurs, et se lievent par eulx ou leurs commis jusques a ce que toutes noz debtes seront paiees et nostredit testament acompli. Et ainsi le voulons et donnons plain povoir a nozdiz executeurs sans que nulz leur y puisse mectre empeschement. Item nous ordonnons, faisons et instituons nostre heritier Jehan nostre filz et ses hoirs masles ainsnés aprés lui descendens de son corps de hoir en hoir masle ainsné, de tous noz biens, terres, rentes et seigneuries, et de toutes les noblesses et dependences d'icelles, sans riens excepter. Et pour le grant et evident prouffit que nous veons d'adjoindre et tenir ensemble noz duchié de Bourbonnois et conté de Forez et que tousjours mais noz heritiers et successeurs aient plus grant puissance et seignourie pour garder et soustenir leursdiz païs, nous prions et requerons a nostre tres chiere et tres amee compaigne que semblablement ledit Jehan nostre filz et sesdiz hoirs masles ainsnés vueille ordonner heritier de ladicte conté de Forez. Et en tant que nous puet toucher a present et pour le temps a venir, nous le ordonnons et instituons et sesdiz hoirs masles par ce present nostre testament et ordonnance en la maniere que dit est nostre heritier de ladicte conté. Item se il plaist a Dieu nostredit filz Jehan ait second filz, nous voulons et ordonnons que ycelui second filz ait la terre et seigneurie de Beaujeu pour son appanage et qu'il porte esquartellez les armes de Beaujeu avecques les nostres. Et oultre ce, nous plaist que nostre tres chiere et tres amee compaigne preigne a sa vie se c'est son plaisir la revenue de nostre seigneurie de Beaujeu selon la transaction, accord et transport fait a nous et a elle par feu nostre tres chier cousin et predecesseur messire Edouart, jadis seigneur dudit Beaujeu. Item nous voulons que Ysabel³ nostre fille soit mariee par l'ordonnance de monseigneur le roy pour tele somme d'argent comme bon lui semblera, sans lui donner aucunes de noz terres. Et pour mieulx acomplir son mariage, lui donnons quarante mil frans pour une foiz a paier les dix mil aux espousailles pour mectre en meuble pour elle et cellui qui sera son espoux, et les trente mil frans a cinq ans chascun an six mille frans pour mectre en terre qui sera heritage de nostredicte fille. Et parmi ce, elle sera tenue de quicter et renoncer a tout le droit de succession de pere et de mere et autrement en la instituant nostre heritiere en ladicte somme. Item voulons et ordonnons que tous acquestz par nous faiz de monseigneur d'Anjou ou autres en la conté de Forez soient et demeurent a nostre tres chiere et tres amee compaigne durant le cours de sa vie, et tous les acquestz de la terre de Combraille et autres par nous faiz en nostre duchié de Bourbonnois et aussi en nostre conté de Clermont soient et demeurent a nostredit filz et a noz hoirs et successeurs ducz de Bourbonnois et contes de Clermont, au cas que nous yrions de vie a trespassement sans hoirs de nostre corps. Item nous voulons et ordonnons que la fondacion et ordonnance de nostre chappelle de Sovigny⁴ tieigne et vaille et, par cest present testament, la confermons par la maniere qu'il est contenu es lettres de la dicte fondacion dont les prieur et convent dudit lieu en ont unes et nous avons les semblables en nostre chambre des comptes. Et aussi semblablement que l'ordonnance que nous avons faicte du college de Molins tieigne et vaille et par cest present testament confermons et ratifions ladicte ordonnance. Item nous voulons et ordonnons noz obseques estre faiz audit lieu de Sovigny le jour de nostre sepulture. Et pour nous humilier envers nostre Createur pour donner bon exemple et convertir l'outrageuse despense qui se peult faire en tel cas en choses plus proffitables au salut des ames et nous plaist que au jour de nostre enterrement, en lieu des chevaulx armez que on seult offrir, des draps d'or, des grans chappelles de cire que on a acoustumé de faire, ait entour nostre corps, qui sera couvers d'un drap noir et une croix blanche dessus, seulement quatre cierges chascun de quinze livre de cire et treize torches chascune de dix livres, lesquelles tendront treize povres, et aura chascun povre une cote noire qui pour nous lui sera donnee. Et sera le cuer environnez de petis cierges ainsi que est acoustumé de faire en tel cas sans avoir plus grant luminaire. Et voulons que le jour de nozdiz obseques, chascun prestre qui vendra ait quatre gros vielz, et par ce sera tenu de chanter deux messes, l'une ledit jour et l'autre le plus tost emprés qu'il pourra, et que chascun povre ait demi gros ou du pain a la value. Et que au quarantiesme jour emprés se face une autre obseque, et voulons que chascun prestre qui y viendra ait deux gros, et par ce sera tenu de chanter comme dessus est declaré, et chascun povre, cinq deniers tournois. Et que l'an revolu, a tel jour comme noz premieres obseques auront esté faictes, s'en face une semblable comme la seconde en ladicte eglise de Sovigny et que a chascun prestre et povre soit donné semblablement comme a ladicte seconde obseque. Voulons et accordons en oultre que a chascune desdictes trois obseques le convent de Sovigny ait quinze livres tournois pour pitance. Item pour ce que nous avons eu plusieurs et divers officiers comme chevaliers, gens de nostre conseil et autres, auxquelx, pour les bons et aggreables services qui nous ont faiz, nous avons donné plusieurs et divers dons, tant de deniers comme de rente a vie et a heritage, nous voulons que tous yceulx dons, c'est assavoir ceulx qui sont faiz de deniers, tieignent et vaillent sans ce que en leur en puisse jamais riens demander, et ceulx de rente a vie et a heritage, dont ilz pourront monstrer bons et loyaulx titres et que nous n'avons point revoquez et dont les paiemens ne auront point esté par nous defenduz, nous yceulx louons, ratifions et approuvons, et par cest present testament les confermons et obligons noz heritiers a les tenir. Item pour ce que nous avons grandement grevez et opprimez noz povres subgiez de Bourbonnois tant pour les subsides, fouages, empruns et autres subvencions que nous y avons fait lever, tant pour nostre delivrance d'Angleterre comme pour la prinse et prison de nostre feue dame et mere, que Dieux absoille, et autres noz affaires, nous voulons et ordonnons que des prouffiz, rentes et emolumens de noz terres et païs, oultre ce que dit est de la chastellenie de Montluçon, des terres de Combraille et de Chastel Chinon et non comprises ycelles terres en ce, soit prinse et levee par la main de noz executeurs la somme de huit mille et cinq cens frans a prandre a quatre annees, de laquelle somme de VIII^M et V^C frans seront distribuez cinq mil frans en aumosne et autres euvres de misericorde, comme a marier povres pucelles, soustenir povres femmes vesves et orphelins, et autres biensfaiz par l'ordonnance de nostredicte compaigne et autres noz executeurs, c'est assavoir : douze cens frans en nostre païs de Forez, six cens frans en Beaujeulois, huit cens frans en Beauvoisin, deux cens frans en Combraille, deux cens frans a Chastel Chinon et deux mille frans en Bourbonnois. Et aussi semblablement pour ce que nous avons eu en noz offices plusieurs et divers officiers, lesquelz nous ont bien longuement et loyalment servy, et ne les avons pas si bien remuneré comme nous deussions et tenuz y sommes, nous voulons que les trois mille cinq cens frans restant d'iceulx huit mille cinq cens frans soient donnez, partiz, divisez et distribuez par nosdiz executeurs, c'est assavoir trois mille frans a noz officiers comme chiefs d'offices, varlez de chambre et autres ainsi qu'il semblera expedient a nozdiz executeurs, et les cinq cens frans seront donnez et distribuez aux petis varlez et familiers de nostre hostel. Item, oultre plus, voulons et ordonnons que en l'annee qu'il plaira a Dieu que nous yrons de vie a trespassement, touz nos povres hommes et subgiez de nostre païs et duchié de Bourbonnois qui nous doivent tailles soient quictes par ledit an de la moitié desdictes tailles a quelque somme que elles montent, c'est assavoir ceulx qui devront dix solz de tailles seront quictes en paiant cinq solz, et ceulx qui doivent vint solz seront quictes en paiant dix solz, et ainsi de plus en plus et de moins en moins. Et semblablement voulons que en noz païs de Forez et de Beaujeulois noz povres subgiez soient tenuz quictes des servis que ilz nous devront ledit an en nous paiant la moitié dudit servis seulement par la maniere que dit est des tailles, afin que nosdiz povres subgiez soient plus enclin et tenuz a prier Dieu pour nous. Item nous laissons et ordonnons pour le remede de nostre ame pour faire noz anniversaires solennelment chascun an en noz eglises qui sont de nostre fondacion cy dessousbz nommees en augmentacion d'icelles a perpetuité, les rentes qui s'ensuivent : premierement au college de nostre chapelle de Bourbon⁵ pour faire nostre anniversaire solennel chascun an le jour de nostre obit, cent solz tournois de rente ; a l'eglise de Vernueil⁶, cent solz tournois de rente ; a l'eglise de Nostre Dame de Montbrison⁷, dix livres tournois de rente ; a Saint Nicolas de Montluçon⁸, cent solz tournois de rente, lesquels colleges et eglises seront tenuz un chascun an de faire noz anniversaires solennelz le jour de nostre obit. Et voulons que en sesdictes esglises en lieu des draps d'or que on a acoustumé d'offrir, on donne garnison d'autel, nappes, frontiez et dossiez, vestements pour prestre, dyacre et soubzdiacre de draps de soye noire ou armoyee a noz armes. Item nous ratiffions et confermons par cest present testament la fondacion de la chapelle que nous avons fondee en l'eglise Nostre Dame de Chartres en la forme et maniere contenue es lettres faictes sur ce. Item nous voulons et ordonnons une autre chapelle perpetuele estre fondee en l'eglise des Jacobins de Paris, laquelle nous avons fait ou ferons ce qu'il en fauldra ordonner, edifier et garnir par une foiz seulement de trois calices, corporaulx, messel, vestemens et autres choses necessaires, en laquelle nous voulons que soit chascun jour perpetuelment une messe celebree en la maniere qui s'ensuit : c'est assavoir le dimenche de l'office du jour mesmes, le lundi des Mors, le mardi du Saint Esperit, le mercredi des Mors, le jeudy de Nostre Dame selon l'office des Advents, c'est assavoir : Rorate celi de super, le venredi de la Magdalene, tant comme nous vivrons, et aprés nostre decés, de Requiem, et le samedi de Nostre Dame selon le temps. Et sera tenu ledit convent que tous les jours aprés la grant messe, cellui qui l'aura chantee yra tout revestu dire De Profundis et certaines oroisons sur la sepulture de noz predecesseurs que avons leans faicte faire. Et avecques ce ordonnons quatre anniversaires estre perpetuelment celebrez en ladicte eglise aux jours ordonnez cy dessoubz, c'est assavoir que feu monseigneur le conte Robert de Clermont, filz de monseigneur saint Loÿs de France, feu monseigneur le duc Loÿs, nostre ayeul, feu nostre tres chier sire et pere le duc Pierre, dont Dieux ait les ames, trespasserent, a chascun desdiz jours, un anniversaire, en lieu du quart tant qu'il plaira a Dieu que nous vivons, ilz diront une grant messe du Sainct Esperit le quart jour d'aoust qu'il a pleu a Dieu nous mectre en ce monde, et aprés nostre trespas sera ladicte messe de mors au jour que nous trespasserons. Et pour les choses dessus dictes faire, nous donnons a ladicte eglise et freres en aumosne la somme de soixante livres tournois de rente chascun an ou la valeur en blé et vin, une somme d'argent pour une foiz pour lesdictes soixante livres tournois au plus prouffitable de ladicte eglise, desdiz freres et greigneur memoire et seurté de l'acomplissement desdictes messes et anniversaires et que par nosdiz executeurs sera ordonné et que faire se pourra. Item nous laissons et donnons au college de Clermont quinze livres tournois pour une fois. Item aux Cordeliers de Paris, quarante livres tournois pour une foiz. Item aux Augustins de Paris, vint frans. Item aux Chartreux lez Paris, trente frans. Item aux Celestins, vingt frans. Item aux XV^XX Avugles, quinze frans. Item a l'hostel Dieu de Nostre Dame de Paris, quinze frans. Item aux religieux de Fremont en Beauvoisin⁹, quinze frans. Item aux freres de Clermont¹⁰, quinze frans. Item aux Cordelliers de Sovigny, trente frans. Item aux Cordelliers de Saint Porsain¹¹, vint frans. Item aux Cordeliers de Nevers, trente frans. Item aux cordeliers de Bourges, dix frans. Item aux Cordeliers de Clermont en Auvergne, dix frans. Item aux cordeliers de Rion, dix frans. Item aux cordeliers de Montbrison, vint frans. Item aux chanoines de Nostre Dame du Puy, quinze frans. Item aux Jacobins de Navarre, dix frans. Item aux Jacobins de Bourges, dix frans. Item aux Jacobins de Clermont en Auvergne, dix frans. Item aux Carmes de Molins, vint frans. Item aux Carmes de Clermont, dix frans. Item aux doyen et chapitre de l'eglise collegial Nostre Dame de Molins, quinze frans en oultre les autres biens par nous a eulx faiz a leur fondacion, laquelle confermons et aggreons. Item a l'abbé et convent de Saint Gilbert¹², dix frans. Item a l'abbé et convent de Sept Fonz¹³, dix frans. Item au prieur et convent de Nostre Dame de Montluçon, cinq frans. Item aux religieux de Grosbosc¹⁴, cinq frans. Item aux chanoines de Messarges¹⁵, cinq frans. Item aux religieux de Nostre Dame de Chappes¹⁶, cinq frans. Item a la maison Dieu de Sovigny, cinq frans. Item a l'ospital du dit lieu, cent solz. Item a l'ospital de Nostre Dame de Roussival, vint frans. Item aux quatre eglises cathedraulx de Bourges, Nevers, Ostun et Clermont, a chascune dix frans. Item a l'opsital de Montbrison, cinq frans. Item au college de l'eglise de Gannat¹⁷, dix frans pour une foiz. Parmi lesquelz lays et dons dessus diz faiz pour une foiz aux dessus diz, un chascun desdiz colleges, eglises et prieurés seront tenuz de nous accompaignez perpetuelment es biensfaiz d'icelles et de faire un obseque solennel au jour que par nozdiz executeurs lui sera fait a savoir, lesquelx dons, lays et autres choses dessus dictes et chascune d'icelles nous voulons et ordonnons que par cest present nostre testament estre faictes et acomplies. Et a ce obligons noz heritiers et tous noz biens quelconques, et par la teneur de nostre present testament faire tenir et acomplir nous les voulons et ordonnons presentement et desja estre obligiez a tousjours mais en la forme et maniere qui cy dessus est a plain contenu. Et pour cest present nostre testament et derreniere voulenté faire tenir, enteriner et acomplir, nous eslisons noz executeurs, c'est assavoir nostre tres chiere et tres amee compaigne la duchesse¹⁸, monseigneur de Berry, nostre tres chier et amé cousin, le conte de la Marche, nostre tres chier et amé nepveu, le sire d'Alebret, connestable de France¹⁹, noz amez chevaliers le sire de Norry²⁰, messire François d'Aubrichcourt²¹, Chastelmorant²², l'Ermite de la Faye²³, messire Hutin le Baveux²⁴, noz amez conseilliers, nostre chancelier qui sera pour le temps²⁵, messire Hymbert de Boisy²⁶, l'abbé du Moustierramé²⁷, maistre Guillaume Nicrant, Gaiget²⁸, Colas Denis²⁹, et maistre Jehan Dent³⁰, et nostre confesseur et nostre tresorier general qui lors seront. Et pour ce que nous avons de faire a l'aide de Dieu une eglise et convent de l'ordre des Celestins en nostre ville de Vichy et que nous ne savons se ladicte eglise et la fondacion d'icelle seront parfaiz et acompliz avant nostre trespassement, nous voulons et ordonnons que tout ce qui restera a faire tant de la dicte eglise en bastimens, maisonnemens, murailles, verrieres, ornemens et vestemens d'autel, livres, calices, meubles pour les religieux de ladicte eglise comme rentes, revenues pour la fondacion et soustenement de ladicte eglise et des religieux d'icelle, laquelle fondacion monte a cinq cens livres tournois de rente sans les meubles et autres necessitez de ladicte eglise et desdiz religieux, soir paracompli, achevé et fourni entierement par noz heritiers et executeurs dessus diz de et sur le plus bel et le meilleur de la revenue de noz terres, rentes, seignories et revenues dessus dictes. Et voulons que deux de noz chevaliers et deux de noz clers dessus nommez avec le consentement de nostredicte compaigne se elle nous survit et de l'un des seigneurs de nostre sang dessus nommez puissent aler avant a l'execution de nostredit present testament comme se ilz estoient tous ensemble. Et voulons et ordonnons que, incontinent avenu le cas que nous serons alé de vie a trespassement, tous noz biens meubles, heritages et autres quelxconques soient en la main de nosdiz executeurs, et desja ycellui cas avenu nous les y mectons jusques a ce que nostre it present testament et chascune des choses contenues en ycellui soient enterinees, faictes et acomplies. Auxquelx noz executeurs nous donnons pooir, auctorité et mandement especial de faire et acomplir les choses dessus dictes par la forme et maniere quil appartient a faire en tel cas. Item, oultre les choses dessus dictes, voulons et ordonnons que en l'eglise de Saint Jehan de Lyon, en la chapelle des XII ou est enseveli feu messire Loÿs, nostre predecesseur, conte de Forez, que Dieux absoille, lequel trespassa a la bataille de Brignés³¹, soit fondee une chapelle ou sera celebré chascun jour une messe et un anniversaire solennel chascun an en ladicte eglise le jour de son trespassement. Et aussi sera faicte la representation dudit messire Loÿs nostre predecesseur en ycelle eglise, dont la presentacion du chapellain de ladicte chapelle appartendra a nous et a noz successeurs contes de Forez et l'institution au doyen dudit lieu. Et avec ce voulons que le prieur de Sovigny qui par le temps sera soit nostre executeur avec les autres dessus nommez. En tesmoing desquelles choses nous avons fait faire et seeller de nostre seel ces presentes lettres et les soubzcrire et signer par le notaire publique ci dessoubz escript et nommé. Donné en nostre chastel de Molins, le XXIIII^e jour de janvier l'an de grace mil CCCC et huit, presens a ce nostre tres chiere et tres amee compaigne la duchesse, noz amez et feaulx chevaliers et conseilliers messire Pierre seigneur de Norry et l'Ermite seigneur de la Faye, messire Jehan le Viste, nostre chancellier, messire Guichard d'Ulphé³², messire Erart seigneur de Chasteau de Montaigne³³, et messire Loÿs de Culant³⁴, noz chambellans et noz bien amez conseilliers, messire Guy de Norry, prieur de Saint Pierre le Moustier³⁵, maistre Pierre de Chantele, nostre aumosnier³⁶, et Jehan Gaiget, tesmoingz a ce par nous appellez et requis.

(Seing manuel du notaire :) Et ego Guillelmus Symonelli de Sancto Salmo, Nivernensis dyocesis publicus apostolica imperiali et regia auctoritate notarius, quia premissis omnibus et singulis dum ut premittitur fierent et agerentur una cum prenominatis testibus presens fui. Ea fideliter publicando aliis occupatus negociis pere alium scribi et in hanc publicam formam verbis gallicis preter morem consuetum ad instanciam predicti domini constituentis et testatoris redigi feci, signoque meo solito signavi subscrivens requisitus et rogatus in testimonium veritatis sub anno et die predictis, indictione secunda more ecclesie gallicane ab eleccione vero domini Petri de Luna in papam Benedictum XIII olim electi anno XV. Rasura XXIII linee ubi corrigendo est scriptum "Item se il plait a Dieu" de certa sciencia hi approbando.

(Sur le repli :) Par monseigneur le duc, monseigneur le conte de Clermont present avecques les tesmoings dessus nommés.