1408, mai. — Moulins (Château).

Loÿs, duc de Bourbonnoys, conte de Forez et seigneur de Beaujeu, per et chambarier de France. Savoir faisons a tous presens et a venir que entre les evres, pensees et sollicitudes que nous avons de governer en paix et eureuse transquillité les terres et seigneries que Dieu nous a balhees entre noz mains, nostre desir et affection qui incessament se torne a leur bien a tous temps esté, est et sera au plaisir Dieu prompt et enclin non mie seulement a tenir et continuer en estat de prosperité sens declin lesdictes terres et seignories maiz aussi est principalment a multiplier, augmenter et acroistre le bon estat et transquilité de la chouse publique de nozdictes terres en les douant de privileges, franchises et prerogatives qui sont les naturelz et principaux biens et commencemens de toutes policies, cités, villes et yconomies, pour ce est il que nous qui a l'aide de nostre Seigneur avons en nostre temps construittes, clouses et ediffiés pluseurs villes et forteresses en nozdiz paÿs qui depuis leur construction sont venues et viennent chascun jour en amendement, considerans la situacion de nostre lieu et bourg de Conne¹ qui est assis en nostre chastellenie de Heriçon², en païs fertile de tous bons prés, de bois, fleuves et estangs et autres eaues, terres laborables, prés et autres aisances servans delitaibles et plaisans a cuers humains, considerans aussi que, audit lieu et bourg de Conne, a pluseurs belles et bonnes maisons et habitacions bien construittes et publé de moult de gens, tant de gens d'estat, marcheans, gens de mestier, laboreurs et autres, et encores feust ledit lieu plus peublé et mieux construit et ediffié, attendu la convenable situacion d'icellui lieu, le grant chemin de France qui y est et la frequentacion des marcheans qui y heritent, se ne fust ce que tous les habitans d'icellui lieu sont noz hommes taillables une foiz l'an ou mois d'aoust a volenté, et au raport de leurs prevostz, balliaux, doublans et tiercens quant le cas y eschiet selon l'usance du paÿs, obstant laquelle condicion les bourghois et autres habitans des autres villes et païs de franche condicion refusent a eulx alier avecques eulx par mariages de leurs enffans et autrement, qui leur est un grant retardement de la multiplicacion et acroissement de leur bien et chevance et empeschement principal de la fortifficacion et cloture dudit lieu de Conne car les habitans d'icellui lieu, considerans la condicion dessus dicte, n'ont cuer ne volonté d'eulx fortiffier ne autrement amender ledit lieu tant que ilz se sentiront soubz la condicion de ladicte taille ; et pour ce nous ont pluseurs foiz supplié et requis lesdiz habitans que il nous pleust les afranchir de ladicte taille et les douer de privileges et prerogatives telx que les autres villes franches de nostre pays de Bourbonnois, et ce faisant ilz sont prest et apparellez d'eulx fortiffier et clorre ledit lieu convenablement, laquelle chouse redondera au grant profit de nous et d'eulx et de tout le païs. Par quoy, aians ces chouses en consideracion et memoire, eu sur ce pluseurs foiz advis et deliberacion avecques nostre conseilh, de nostre certaine science et grace especial et de nostre auttorité et puissance, ledit lieu de Conne et tous les habitans en icellui lieu qui ad present sont et pour le temps a venir seront habitans au pourpris de trois pons de pierre estans sur les riveres et costé ledit lieu de Conne, et une croix par ou l'en va dudit lieu de Conne a Villefranche³ appellee la croix de Chalenulier en traversant d'une riviere a autre au droit et parmi ladicte croix, lesquelx lieu et habitans sont tallables d'une taille en aoust comme dit est et ne sont d'autre condicion, et chacsun d'eulx et leurs successeurs perpetuelment avons afranchi et afranchissons a tousjours mais, et voulons que ledit lieu de Conne selon le pourpris et circuité des limites dessus dictes soit et demeure doresenavant lieu franc, et que tous les habitans en icellui soient franches personnes perpetuelment selon les franchises et libertés et par la forme et maniere que les autres villes franches de nostre païs de Bourbonnois et les habitans d'icelles sont et ont acoustumé d'estre, lesquieulx habitans de Conne et leurs successeurs sont et seront quictes et exemps perpetuelment de paier ladicte taille en aoust que ilz payoyent par avant la date de cez lettres et du charoy, manovre et blayries⁴, laquelle taille enssamble lesdiz charroy, manovre et blayries nous leur quictons perpetuelment et a leursdiz successeurs, reservé avons a nozdiz successeurs que lesdiz habitans de Conne et leursdiz successeurs nous paieront pour le charroi abomé^a chascun an cent solz tornois. Item en lieu de ladicte tailhe en aoust qui maintenant leur est quittee, lesdiz habitans et leursdiz successeurs paieront chascun an a nous et a nozdiz successeurs doresenavant a la Saint Michel franche censive ou bourghoisie en la maniere que il est contenu es previleges de la ville de Heriçon et que les bourghois et habitans dudit lieu de Heriçon ont acostumé de paier, c'est assavoir chascun bourghoiz ou habitans six solz tornois ou cinq solz ou quatre ou trois ou deux ou dix huit deniers du moins chascun an de franche censive au terme de Saint Michel. Item nous paieront lesdiz habitans les quatre cas a volenté quant ilz eschairont selon la faculté de leurs biens et de ladicte ville eu esgart a noz autres villes de Bourbonnois par la forme et maniere que les autres bonnes villes franches de nostre paÿs de Bourbonnois les nous ont acoustumé de paier, c'est assavoir pour chevalerie, mariage, voyaige d'oultre mer et prison dont Dieux nous gart. Item nous et nosdiz successeurs aurons nostre ban de vendre vin doresenavant chascun an audit lieu de Conne ou moys d'aoust, aussi que nous l'avons en autres noz villes franches de Bourbonnois. Item nous paieront lesdiz habitans de Conne noz cens a nous dehuz et les los et les ventes de leurs heritaiges et possessions quant le cas y eschaira. Item et parmi ce toutes reddevances et devoirs qui pourront sentir aucune servitude sur lesdiz habitans et sur ledit lieu de Conne sont et seront afranchiz, tornés et convertis la franche reddevance. Item lesdiz habitans de Conne clorront et fortiffieront ledit lieu et bourg de Conne dedanz douze ans prochains venans, toutesvoyes ou cas que dedans iceulx douze ans lesdiz habitans n'auroient close et fortiffiee ledit lieu et bourg de Conne, il n'est pas nostre entente que ces presens previleges, franchises et libertés soient pour ceste faulte ou negligence de rienz enffraint ou corrompus ainçois demereront entiers et valaibles perpetuelment, maiz iceulx habitans seront et porront estre contrainz et compellez par nous et noz gens a icelle ville et lieu de Conne clorre et fortiffier se dedans ledit temps elle n'estoit close. Item et lesdiz habitans de Conne et franchise d'icelle seront quittes et exemps de faire guet et garder portes en nostre chastel de Heriçon, lequel guet et garde porte ilz feront audit lieu et ville de Conne quant elle sera clouse et fortiffiee. Item en oultre plus ottroyons esdiz habitans et franchise d'icelle, presens et a venir, que quelconque personne que sera tenans feu et lieu audit lieu de Conne, que aprés ce qu'ilz auront demoré par an et par jour, que ilz soient et demeurent a tousjours maiz frans bourghoiz et aux us, coustumes, franchises et libertés anciennes de nostre ville de Heriçon, reservé a nous es chouses dessus dictes ce qui s'ansuyt : premerement que ce n'est pas nostre entente que en ce present previlege et liberté soient en rienz compris noz hommes taillaibles de trois tailhes l'an, tant de la chastellenie de Heriçon comme d'ailheurs, ne noz hommes de la condicion des quatre deniers de Chantelle⁵, ne autres noz hommes serfz et de condicion, ne que par demorance que ilz facent ou feissent audit lieu de Conne, ilz acquierent franchise ne liberté aucune ; et aussi en ce ne voulons en rienz estre compris les hommes serfz de noz vassaulx, subgiez et feaulx se aucuns y venoient demorer. Item, et en toutes autres chouses, nous voulons que lesdiz habitans de Conne et franchise d'icelle et leursdiz successeurs puissent doresenavant et soient et demeurent en toutes chouses et usaiges, franchises et libertés dont les habitans de Heriçon joïssent et ont acoustumé de joïr. Et pour ce ottroyons esdiz habitans de Conne au suplus autant et tieulx et samblables privileges, libertés et franchises que ont les habitans dudit lieu de Heriçon, lesquieulx se comportent aux previleges des habitans de Monluçon⁶, voulons que d'autant et d'autieulx previleges et franchises dont lesdiz habitans de Heriçon joïssent et ont acoustumé de joïr, iceulx habitans de Conne et franchises d'icelle joïssent et joyront doresenavant, supposé que iceulx previleges ne soient exprimez en particulier en cez presentes ; voulons aussi que desdiz previleges de Heriçon soient baillees coppies soubz nostre seel esdiz habitans enssamble des previleges de Monluçon a qui ceulx de Heriçon se raportent, lesquelles coppies nous voulons valoir originaulx pour eulx et leurs successeurs. Et samblablement voulons que le vidimus de cez presentes faiz soubz l'un de noz seaulx vaille original partout ou cez lettres feroient besoing, lesquieulx previleges et franchises dessus diz et chascun d'eulx par nous ottroiés esdiz habitans de Conne nous leur promettons tenir et garder par nous ; et voulons estre tenus et gardés par noz successeurs et officiers presens et a venir perpetuelment. Si donnons en mandement par cez presentes a noz amés et feaulx gens de noz comptes, balli et tresorier et procureur de Bourbonnois, et a tous noz autres justiciers et officiers presens et a venir et a leurs lieutenans et a chascun d'eulx si comme a lui apartiendra, que lesdiz habitans de Conne et leurs successeurs habitans dudit lieu perpetuelment facent, laissent et seuffrent doresenavant joïr et user des previleges, franchises et libertés dessus dictes et de tout le contenu en cez nos lettres, ensemble du contenu es lettres et previleges de Heriçon et a ceulx de Monluçon a qui ceulx de Heriçon se comportent, sans les enffraindre et sans iceulx habitans ne aucun d'eulx molester ne empescher, ne souffrir ores ne pour le temps a venir en aucune maniere au contraire, maiz tout ce que contre la teneur de cez lettres auroit esté atempté ou innové ramenent ou facent ramener tantost et sans delay au premier estat et dehu. Et affin que ce soit ferme chouse et estable a tousjours maie, nous avons fait mettre nostre seel a cez presentes, sauf en autres chouses nostre droit et l'autruy en toutes. Donné en nostre chastel de Molins, ou mois de may, l'an de grace mil quatre cens et huit.

Par monseigneur le duc, en son conseilh ou le sire de Norry⁷, maistres Jehan Marcheant⁸, Pierre de Tolon⁹, Guillaume Garitel¹⁰, Jehan Gaiget¹¹ et pluseurs autres estoient