1407, 1er juillet. — Paris.

Loÿs, duc de Bourbonnois, conte de Forez et seigneur de Beaujeu, per et chamberier de France, a tous ceulx qui ces lectres verront, salut. Comme feu nostre tres chier et amé cousin et predecesseur messire Antoine, jadiz seigneur de Beaujeu, eust vendu le peage de Montbellet mouvant de nostre fief a cause de nostre seignorie de Beaujeuloiz, a messire Jehan de Challes, pour le pris et somme de huit cens frans, et ou traitié de la vendicion nostredit cousin eust reservé pour luy et ses ayans cause le rachapt dudit peage pour le ravoir et rachepter toutes les foiz qu'il lui playroit ou a ses hoirs et ayans cause et en payant ladicte somme de huyt cens frans ; et a cause de ce, le rachapt dudit peage nous appartiengne comme aiant cause dudit nostre cousin toutes les foiz que nous vouldrions paier ladicte somme ; et il soit ainsi que de nouvel nostre bien amé Hugonet Baudet ait nouvellement acquis et acheté ledit peage de Montbellet de Pierre de Challes, heritier du messire Jehan en ceste partie pour le pris et somme de cinq cens frans de premier achapt, et encoures plus cinquante escuz pour avoir le rachapt qu'il a donné audit Pierre de Chales, et a cause de ceste derreniere vendicion, la retenue dudit peage nous compete et appartiengne se bon nous semble par puissance de fiefz pour ce que ledit peage est mouvant de nostre fiefz comme dit est, lesquelx rachaps et retenue ledit Hugonet nous a humblement supplié et requis que lui voulsissions gracieusement donner et octroyer. Savoir faisons que, pour consideracion des bons et agreables services que ledit Hugonet Baudet nous a faiz ou temps passé, fait chascun jour et esperons que encoures face ou temps advenir, nous, a icellui Hugonet et es siens perpetuelement, de nostre certaine science et grace especial avons donné, cedé, quicté, delaissé et transporté, et par ces presentes donnons, cedons, quictons, delaissons et transportons le rachapt et retenue dudit peage de Montbelet et tout le droit et action que nous avons au rachapt et retenue d'icellui peage, tant a cause de la reservacion faicte a ladicte vendicion d'icellui peage par ledit feu messire Antoine, nostre cousin, comme par ceste derreniere acquisicion que ledit Hugonet en a faicte dudit de Chales dont la retenue nous appartenoit par puissance de fiefz comme dit et voulons que il puise poursuir nostredit rachapt et retenue sur ledit peage comme nous mesmes le ferions, et a ce faire le constituons principal acteur et procureur et demandeur, reservé a nous seulement les fiefz et hommage dudit peage a nous deuez d'ancienneté, lesquelx foy et hommage ledit Hugonet nous a faiz. En tesmoing de ce, nous avons fait mectre nostre seel secret a ses presentes. Donné a Paris, le premier jour de juillet, l'an de grace mil CCCC et sept.

Par monseigneur le duc, monseigneur l'Ermite de La Faye¹ present.