1406, octobre. — Paris.

Loÿs, duc de Bourbonnois, conte de Fourez, baron et seigneur de Beaujeu, per et chamberier de France. Savoir faisons a tous presens et avenir nous avoir receue l'umble supplicacion de noz bien amez les bourgois et habitans de nostre ville et franchise de Molins contenant que par noz predecesseurs, seigneurs et dames de Bourbonnois, leur ont esté donnez et octroyés plusieurs beaux, bons et notables previleges, libertés, franchises et ordonnances qui depuis ont esté louez, agreez, approuvez et conservees par nostre tres chier seigneur et ayeul monseigneur Loÿs, duc de Bourbonnoys, que Dieu absoille, comme par ses lectres confirmatoires seellees de son grant seel, esquelles tous lesdiz previleges, libertés, franchises et ordonnances dessus diz octroyez ausdiz bourgoiz et habitans par nosdiz predecesseurs sont incorporez de mot a mot, nous est souffisanment apparu, desquelles lectres confirmatoires par nous veues, leues et tenues la teneur s'ensuit : "Nous Loÿs, duc de Bourbonnoys, conte de Clermont et de la Marche, chamberier de France, savoir faisons a tous presens et avenir que nous avons veues unes lectres ou previlege octroyé jadiz a la ville de Molins sur Alier de bonne memoire dame Agnes, jadiz dame de Bourbonnoys, nostre tres chiere ayeule, que Dieux absoille, faictes soubz son seel en cire vert non reses, non corrompues en aucune partie, saines et entieres, dont la teneur s'ensuit :

[Suit le texte des lettres de franchises et de privilèges octroyés par Agnès de Bourbon en mai 1268, puis de la confirmation de Louis I^er octroyée en novembre 1340]

Par le moyen desquelx previleges ladicte ville, qui par avant l'octroy d'iceulx avoit de moult grans charges dont elle a esté relevee par nosdiz predecesseurs et ayeul, s'est moult repeuplee et mise en estat convenable, pour quoy lesdiz bourgoiz et habitans nous ont humblement supplié et requis que, en s'ensuivant les traces a l'exemple de nosdiz predecesseurs et ayeul, il nous plaise yceulx previleges confermer, consideré que pour ce ladicte ville se pourroit tous jours continuer et conserver en estat de transquilité et le bien a la chose publique d'icelle acroistre et augmenter qui par la non confirmacion desdis previleges pourroit tourner au contraire que ja n'avieigne. Pour ce est il que nous, ces choses considerees, ayans en memoire la grant amour et parfaicte dilection et affection que lesdiz bourgois et habitans et leurs predecesseurs ont de tous temps eue envers nous et nozdiz predecesseurs par vraye subgection et parfaicte obeïssance, desirans de tout nostre cuer le bien d'eulx et de leurs successeurs et la conservacion et augmentacion de leur chose publique en parfaite prosperité, inclinans a la supplicacion et requeste desdiz bourgoiz et habitans, de nostre certaine science et grace especial et de nostre auctorité et puissance avons loué, agree, ratiffié, approuvé et confermé, et par ces presentes louons, agreons, ratiffions, approuvons et confermons les previleges, franchises, statuz et ordonnances dessus transcrips et tous les poins, clauses et articles contenuz en yceulx pour et au prouffit desdiz bourgois et habitans de ladicte ville et de leurs successeurs habitans d'icelle perpetuelment et a tous jours maiz, voulens et octroyans a yceulx bourgoiz et habitans que d'iceulx previleges et de toutes les choses, poins, clauses et articles dessus contenuz eulx et leursdiz successeurs joïssent et puissent doresenavant joïr et user perpetuelment et paisiblement et qu'ilz soient a tous jours maiz tenuz gardez et observez par nous et par tous autres a qui il appartiendra de point en point tout ainsi et par la forme et maniere qu'il est exprimé, contenu et declairé en yceulx previlleges, non obstant que d'iceulx previleges ou d'aucun d'eulx lesdiz habitans n'en eussent usé ou temps passé ou que par avanture nous ou eulx en eussions mal usé ou abusé dont nous les en avons relevez et relevons par ces mesmes presentes. Promectans en bonne foy pour nous et nozdiz successeurs tenir et fere tenir, garder et acomplir les previleges et franchises dessus diz, et a ce faire obligons nous et nosdiz successeurs et les biens de nous et d'eulx presens et avenir. Si donnons en mandement par ces presentes a noz amez et feaulx gens de noz comptes, bailli et procureur de Bourbonnoys, aux chastellains de Molins, de Vernueil², de Billi³, de Monluçon et a tous noz autres justiciers, officiers et subgiez presens et avenir ou a leurs lieuxtenans et a chascun d'eulx si comme a lui appartiendra que lesdiz bourgois et habitans et leursdiz successeurs des previleges dessus transcripz et de toutes les clauses, poins et articles en yceulx contenuz facent, laissent et sueffrent joïr et user doresenavant plainement, paisiblement et perpetuelment sanz les molester ou empeschier ou sueffrir estre molestés ou empeschés ores ne pour le temps avenir en aucune maniere au contraire, maiz tout ce qui auroit esté fait ou innové contre la teneur d'iceulx previleges ou d'aucun d'iceulx au prejudice d'iceulx ramenent et remectent ou facent ramener et remectre tantost et sanz delay au premier estat et deu. Et affin que ce soit ferme chose et estable a tous jours maiz, nous avons fait mectre nostre seel a ces presentes, sauf nostre droit en autres choses. Donné a Paris, ou moys d'octobre, l'an de grace mil quatre cens et six.

Par monseigneur le duc^a, present messire Estienne de Norry⁴.

Collation a esté faicte par moy a l'original